আমেৰিকাৰ ‘সতৰ্কবাণী’ক আওকাণ; টাইৱানক কেন্দ্ৰ কৰি সামৰিক অনুশীলন আৰম্ভ কৰিছে চীনে

সোমবাৰে চীনে টাইৱানক কেন্দ্ৰ কৰি যুদ্ধ বিমান আৰু জাহাজ মোতায়েন কৰে। বেইজিঙে কয় যে নতুন সামৰিক অনুশীলনৰ লক্ষ্য হৈছে টাইৱানৰ “বিচ্ছিন্নতাবাদী” বাহিনীলৈ কঠোৰ সতৰ্কবাণী প্ৰেৰণ কৰা।

চীনে লগতে কয় যে এই অনুশীলন ৰাষ্ট্ৰৰ সাৰ্বভৌমত্ব আৰু জাতীয় ঐক্য ৰক্ষাৰ বাবে এক বৈধ আৰু প্ৰয়োজনীয় অভিযান।

স্ব-শাসিত টাইৱানক চীনৰ নিয়ন্ত্ৰণলৈ অনাৰ বাবে বল প্ৰয়োগ কৰাটো বেইজিঙে নুই কৰা নাই। যোৱা দুবছৰত চতুৰ্থবাৰৰ বাবে চীনে টাইৱানক কেন্দ্ৰ কৰি বৃহৎ পৰিসৰৰ সামৰিক অনুশীলন চলাইছে।

যোৱা বৃহস্পতিবাৰে টাইৱানৰ ৰাষ্ট্ৰীয় দিৱস উদযাপনৰ সময়ত ৰাষ্ট্ৰপতি লাই চিং- টেই দিয়া ভাষণে বেইজিঙক ক্ষুব্ধ কৰি তুলিছিল। কেইদিন পিছত চীনে টাইৱানক কেন্দ্ৰ কৰি সামৰিক অনুশীলন আৰম্ভ কৰিলে।

লগতে পঢ়কঃ গোহালি চাফা কৰি তাতেই শুই থাকক, দূৰ হ’ব কেন্সাৰ! বিজেপি নেতাৰ অদ্ভুত নিদান

লাই চিং-টেই দিয়া ভাষণত তেওঁ টাইৱানৰ ‘সংলগ্ন’ প্ৰতিহত কৰাৰ প্ৰতিশ্ৰুতি দিছিল। তেওঁ জোৰ দি কয় যে বেইজিং আৰু টাইপেই ইটোৱে সিটোৰ অধীনস্থ নহয়।

টাইৱানৰ ৰাষ্ট্ৰপতিৰ এই বক্তব্যৰ পিছতে চীনে সতৰ্কবাণী জাৰি কৰে। বেইজিঙে কয় যে লাই চিঙৰ এই “প্ৰৰোচনা”ই টাইৱানৰ জনসাধাৰণৰ বাবে “বিপৰ্যয়”ৰ সৃষ্টি কৰিব।

চীনৰ সতৰ্কবাণীৰ পিছতে বেইজিঙক টাইৱানৰ পক্ষ সন্দৰ্ভত সকীয়াই দিয়ে আমেৰিকাৰ বিদেশ মন্ত্ৰী এণ্টনি ব্লিংকেনে।

কিন্তু আমেৰিকাৰ ‘সতৰ্কবাণী’ক আওকাণ কৰি চীনে টাইৱানৰ আশে-পাশে সামৰিক অনুশীলন আৰম্ভ কৰিলে।

চলিত বৰ্ষৰ মে’ মাহত লাই চিং-টাইয়ে টাইৱানৰ ৰাষ্ট্ৰপতিৰ দায়িত্ব গ্ৰহণ কৰে। তেওঁৰ পূৰ্বৰ ছাই ইং-ৱেনতকৈ চীনৰ বিষয়ে অধিক স্পষ্টবাদী। বিশেষকৈ টাইৱানৰ সাৰ্বভৌমত্ব ৰক্ষাৰ প্ৰশ্নত।

লগতে পঢ়কঃ পেটৰ ভিতৰত বাহ সাজিছিল জীৱন্ত পইতাচোৰাই! চিকিৎসকৰ ‘যাদু’ত জীৱন ৰক্ষা পৰিল দিল্লীৰ যুৱকৰ

লাই চিঙৰ এই স্থিতিৰ বাবে চীন অতিশয় ক্ষুব্ধ। বেইজিঙে তেওঁক ‘বিচ্ছিন্নতাবাদী’ বুলি অভিহিত কৰি আহিছে।

চীনৰ শেহতীয়া সামৰিক অনুশীলনক টাইৱানে গৰিহণা দিয়ে। তেওঁলোকে এই অনুশীলনক ‘অযুক্তিকৰ’ আৰু ‘উচটনিমূলক’ বুলি অভিহিত কৰে।

টাইপেইয়ে কয় যে ইতিমধ্যে অনুশীলনৰ প্ৰতি সঁহাৰি জনাবলৈ তেওঁলোকে  “উপযুক্ত বাহিনী” প্ৰেৰণ কৰিছে।