ক’ৰ’নাতংকৰ মাজতে দেৱী দূৰ্গাৰ প্ৰতিমা গঢ়াত ব্যস্ত গটঙাৰ মৃৎ-শিল্পী সকল

এয়া শৰৎ কাল, সমাগত দূৰ্গা পূজা!

দীঘলীয়া ক’ভিড সৃষ্ট পৰিস্থিতিৰ বাবে বিগত বছৰ দূৰ্গা পূজা অনুষ্ঠিত কৰিব নোৱাৰাৰ বিপৰীতে ৰাজ্যৰ মুখ্যমন্ত্ৰী গৰাকীয়ে এই বছৰ শাৰদীয় পূজা ভাগ অনুষ্ঠিত কৰিব পৰা যাব বুলি ঘোষণা কৰাৰ পিছত এতিয়া অধিক ব্যস্ত হৈ পৰিছে ৰাজ্যৰ মৃৎ-শিল্পী সকল।

ঠিক একেদৰে, নগাঁও জিলাৰ চামগুৰিৰ গটঙা স্থিত চাৰিখনকৈ প্ৰসিদ্ধ মূৰ্তিকাৰৰ প্ৰতিস্থানৰ মৃৎশিল্পী সকলৰ মাজত এতিয়া সীমাহীন উল্লাস, অন্ত নাই ব্যস্ততাৰ।

অতি কম দিনৰ ভিতৰত শাৰদীৰাণী মা-দূৰ্গাৰ প্ৰায় ৫০টা মৃন্ময় মুৰ্তি নিৰ্মাণ কৰিব লগীয়া হোৱাত এতিয়া অত্যাধিক ব্যস্ত প্ৰতিষ্ঠান কেইখনৰ মৃৎশিল্পী সকল।

অৱশ্যে পূৰ্বৰ তুলনাত বহু কম সংখ্যক মুৰ্তি নিৰ্মাণৰ কাম পূজা কমিটি সমূহে অৰ্ডাৰ হিচাবে দিছে। সেয়ে আগন্তুক দূৰ্গা পূজাই আশাৰ ৰেঙনি কঢ়িয়াই আনিছে গটঙাৰ মূৰ্তিকাৰ সকলৰ পৰিয়াল সমূহৰ মাজলৈ।

উল্লেখযোগ্য যে, গটঙাৰ মৃৎশিল্পী সকল বিভিন্ন দেৱ-দেৱীৰ মূৰ্তি নিৰ্মাণৰ ক্ষেত্ৰত কেৱল পেছাগত ভাৱেই জড়িত নহয়, জড়িত আবেগিক ভাৱেও!