অক্টোবৰৰ পাছত পৰ্যটকৰ বাবে পুনৰ মুকলি হ’ব অৰুণাচল প্ৰদেশ
অৰুণাচলপ্ৰদেশৰ মুখ্য মন্ত্ৰী পেমা খাণ্ডুৱে অক্টোবৰৰ পাছতহে পৰ্যটক সকলৰ বাবে অৰুণাচল প্ৰদেশৰ পৰ্যটন স্থান মুকলি কৰি দিব বুলি প্ৰকাশ কৰে।
কেন্দ্ৰীয় চৰকাৰৰ কোভিড-১৯ সম্বন্ধীয় গাইডলাইন সমূহ পৰ্যালোচনা কৰাৰ পাছতহে অক্টোবৰৰ পৰৱৰ্তী সময়ত পৰ্যটকসকলৰ বাবে অৰুণাচলপ্ৰদেশৰ পৰ্যটনস্থান সমূহ মুকলি কৰি দিয়া হ’ব।
ড’নাৰ মন্ত্ৰ্যালয়ৰ লক্ষ্যস্থান নৰ্থ-ইষ্ট-২০২০ শীৰ্ষক অনুষ্ঠানত অংশগ্ৰহণ কৰি পেমা খাণ্ডুৱে চলিত মহামাৰীৰ বাবে উত্তৰ-পূবৰ পৰ্যটন ক্ষেত্ৰত ব্যপক লোকচানৰ সন্মুখিন হ’বলগীয়া হৈছে বুলি কয়।
পৰ্যটন ক্ষেত্ৰই লোকচানৰ সন্মুখিন হ’বলগীয়া হোৱাত ইয়াৰ প্ৰভাৱ ৰাজ্যৰ ৰাজহ সংগ্ৰহটো পৰিছে বুলি মুখ্য মন্ত্ৰী গৰাকীয়ে লগতে কয়।
‘‘ৰাজহ সংগ্ৰহ আৰু নিয়োগৰ ক্ষেত্ৰত পৰ্যটন উদ্যোগে উল্লেখযোগ্য বৰঙণি আগবঢ়াই আহিছে আৰু ইয়াৰ প্ৰতি লক্ষ্য ৰাখি পৰ্যটন খণ্ড পুনৰ মুকলি কৰাৰ ক্ষেত্ৰত সিদ্ধান্ত গ্ৰহণ কৰা হ’ব,’’ মুখ্য মন্ত্ৰী পেমা খাণ্ডুৱে এইদৰে কয়।
লক্ষ্যস্থান নৰ্থ-ইষ্ট শীৰ্ষক অনুষ্ঠানৰ যোগেৰে দেশৰ বিভিন্ন প্ৰান্তৰ লোকক উত্তৰ-পূবৰ প্ৰতি আগ্ৰহী কৰি তোলাৰ লক্ষ্য নিৰ্ধাৰণ কৰা হৈছিল।
কেন্দ্ৰীয় গৃহ মন্ত্ৰী অমিত শ্বাহৰ উপস্থিতিত ড’নাৰ মন্ত্ৰী জিতেন্দ্ৰ সিঙে চাৰিদিনীয়া লক্ষ্যস্থান নৰ্থ-ইষ্ট শীৰ্ষক অনুষ্ঠানটো শুভ উদ্বোধন কৰে।