আন এক ভাৰত-পাক ৰোমাঞ্চ: স্নায়ু যুঁজত জয়েৰে স্কোৱাছত স্বৰ্ণ জয় ভাৰতৰ

ক্ৰীড়াবিশ্বত ভাৰত বনাম পাকিস্তান মানেই এক চৰম উৎকণ্ঠা, ৰোমাঞ্চপূৰ্ণ খেল। সেয়া ক্ৰিকেটেই হওক অথবা হকীয়েই হওক, নতুবা জেভেলিনৰ প্ৰতিদ্বন্দিতাই হওক। ভাৰত-পাকিস্তানৰ মাজত আন এক ৰোমাঞ্চকৰ যুঁজৰ সাক্ষী হ’ল ক্ৰীড়াবিশ্ব।

চীনৰ হাংঝ’ত চলি থকা এছিয়ান গেমছৰ আজি সপ্তম দিনা অনুষ্ঠিত হোৱা স্কোৱাছৰ দলীয় শাখাত এক তীব্ৰ উত্তেজনাপূৰ্ণ মেচত অৱতীৰ্ণ হয় ভাৰত-পাকিস্তান। প্ৰতিদ্বন্দিতাপূৰ্ণ এই মেচখনত অৱশেষত বিজয়ৰ শেষ হাঁহি মাৰি স্বৰ্ণ জয় কৰে ভাৰতীয় দলে।

উত্তেজনাপূৰ্ণ ফাইনেলখনত প্ৰথম মেচখনত মহেশ মঙ্গাওকাৰ পৰাস্ত হয় যদিও দ্বিতীয় মেচত জয়েৰে ভাৰতৰ হৈ সমতা স্থাপন কৰে সৌৰভ ঘোষালে।

আনহাতে নিৰ্ণায়ক মেচখনত অভয় সিঙে তীব্ৰ প্ৰত্যাহ্বানৰ অন্তত প্ৰতিপক্ষ নুৰ জামানক পাঁচ ছেটৰ মাৰাথান যুঁজত ৩-২ ব্যৱধানত পৰাস্ত কৰি স্বৰ্ণ নিশ্চিত কৰে।

লক্ষণীয়ভাৱে দিনটোত এয়া আছিল ভাৰতৰ দ্বিতীয়টো স্বৰ্ণ। স্কোৱাছৰ পূৰ্বে টেনিছৰ মিক্সড ডাবলছত ৰোহন বোপান্না আৰু ৰুতুজা ভোছাল যুটীয়ে ভাৰতক আজিৰ প্ৰথমটো আৰু সামগ্ৰিকভাৱে নৱমটো স্বৰ্ণৰ সোৱাদ দিয়ে।

ইফালে চলি আছে পুৰুষৰ বেডমিণ্টনৰ ছেমি ফাইনেল। দক্ষিণ কোৰিয়াৰ বিপক্ষে চলি থকা ছেমিফাইনেলত ১-১ ব্যৱধানত অৱস্থান কৰি আছে দুয়োটা দল। ফাইনেলত প্ৰৱেশৰ লক্ষ্যৰে ভাৰতীয় দলৰ হৈ নিৰ্ণায়ক মেচত নামিছে লক্ষ সেন।

সেইদৰে বক্সিঙত নিজ নিজ শাখাৰ কোৱাৰ্টাৰত জয়েৰে ছেমিত প্ৰৱেশৰ লগতে পদকো নিশ্চত কৰিছে অসমৰ লাভলিনা বৰগোহাঁইৰ লগতে আন দুগৰাকী বক্সাৰ প্ৰীতি পাৱাৰ আৰু নৰেন্দৰে।

অৱশ্যে দিনটোৰ এই সফলতাৰ বিপৰীতে ভাৰতৰ অন্যতম প্ৰধান পদক প্ৰত্যাশী মীৰাবাঈ চানু পদক জয়ত বিফল হয়। ভাৰোত্তোলনৰ নিজ শাখাত চতুৰ্থ স্থানতে সন্তুষ্ট থাকে চানু।

সেইদৰে টেবুল টেনিছৰো মহিলাৰ একক শাখাৰ কোৱাৰ্টাৰ ফাইনেলত য়িডি ৱাঙৰ বিৰুদ্ধে ২-৪ ব্যৱধানত পৰাস্ত হৈ বিদায় লয় মণিকা বাট্ৰাই।