আছু-এজেৱাইচিপিৰ নতুন ৰাজনৈতিক দলৰ নাম হ’ব অসম জাতীয় পৰিষদ

অৱশেষত অংকুৰিত হ’ল আছু আৰু অসম জাতীয়তাবাদী যুৱ ছাত্ৰ পৰিষদৰ নতুন ৰাজনৈতিক দল।

আছু আৰু অসম জাতীয়তাবাদী যুৱ ছাত্ৰ পৰিষদৰ নতুন ৰাজনৈতিক দলটোৰ নাম হ’ব অসম জাতীয় পৰিষদ।

ৰাজনৈতিক দল গঠনৰ বাবে গঠন কৰি দিয়া আহ্বায়ক সমিতিয়ে বাচনি কৰি উলিয়াইছে এই নাম।

সোমবাৰে মহানগৰীৰ পানবজাৰস্থিত হোটেল প্ৰাগ কণ্টিনেণ্টেলত এই নাম ঘোষণা কৰে আহ্বায়কদ্বয় ক্ৰমে ডঃ কৃষ্ণ গোপাল ভট্টাচাৰ্য্য আৰু ড০ বসন্ত ডেকাই।

যোৱা শনিবাৰে আছু- এজেৱাইচিপিৰ নেতৃত্বই এই দুই আহ্বায়কৰ হাতত পৰামৰ্শ দাতা কমিটিৰ প্ৰতিবেদনৰ দায়িত্ব অৰ্পণ কৰিছিল।

দলটোৰ মুখ্য লক্ষ্য আৰু উদ্দেশ্য হ’ব “অসম প্ৰথম সদায় আৰু চিৰদিন”। সেইদৰে, দলটোৰ শ্লোগান হ’ব ‘ঘৰে ঘৰে আমি’।

আনহাতে, আজিৰে পৰাই অসম জাতীয় পৰিষদৰ দলীয় কামকাজ আৰম্ভ হ’ব। কাইলৈৰ পৰা সদস্য ভৰ্তিকৰণ প্ৰক্ৰিয়া আৰম্ভ হ’ব।

জোনাই, ধেমাজিৰ দায়িত্ব দিয়া হৈছে আছুৰ সদ্য পদত্যাগী নেতা চিত্ৰৰঞ্জন বসুমতাৰীক।

ঠিক সেইদৰে ৰাজু ফুকনক দিয়া হৈছে গোলাঘাট, যোৰহাট আৰু বোকাখাতৰ দলীয় কাম কাজ চোৱাৰ দায়িত্ব।

আনহাতে, চুতীয়া জাতি সন্মিলনৰ সভাপতি হৰেন চুতীয়াক দিয়া হৈছে লক্ষীমপুৰৰ দায়িত্ব।

দলটোৰ সমন্বয়ক হিচাপে প্ৰাক্তন মন্ত্ৰী তথা জ্যেষ্ঠ সাংবাদিক জগদীশ ভূঞাক দায়িত্ব দিয়া হৈছে বুলি সংবাদমেলত জনায় ডঃ কৃষ্ণ গোপাল ভট্টাচাৰ্যই।