শিক্ষা মন্ত্ৰীক স্মাৰক পত্ৰ প্ৰদান অসম ছাত্ৰ পৰিষদৰ; ছাত্ৰ-ছাত্ৰীৰ ল’কডাউনকালীন সমস্যা সমাধানৰ আহ্বান

ল’কডাউনৰ সময়ছোৱাত ছাত্ৰ-ছাত্ৰী বিভিন্ন সমস্যা দাঙি ধৰি শিক্ষা মন্ত্ৰীক স্মাৰক পত্ৰ অসম ছাত্ৰ পৰিষদৰ।

কালি ছাত্ৰ সংগঠনটোৰ বিষয়ববীয়াই শিক্ষা মন্ত্ৰীক সাক্ষাৎ কৰি ছাত্ৰ ছাত্ৰীৰ বিভিন্ন সমস্যা সমাধানৰ বাবে আহ্বান জনায়।

বিশেষকৈ ছাত্ৰ ছাত্ৰীৰ মানসিক স্বাস্থ্য সুদৃঢ় কৰা, অনলাইন পাঠ্যক্ৰম, ষান্মসিক পৰীক্ষা ইত্যাদি বিষয়ত গুৰুত্ব আৰোপ কৰিবলৈ ছাত্ৰ সংগঠনটোৱে শিক্ষা মন্ত্ৰীক আহ্বান জনায়।

আজি এই সন্দৰ্ভত এক সংবাদমেল সম্বোধন কৰি অসম ছাত্ৰ পৰিষদৰ সভাপতি ত্ৰিনয়ন বৰুৱাই কয় “শিক্ষাবৰ্ষ, স্নাতক, স্নাতকোত্তৰ ষান্মসিক পৰীক্ষা বাতিলৰ আশংকা আহি পৰিছে। গতিকে এই ক্ষেত্ৰত যাতে ছাত্ৰ ছাত্ৰীৰ শিক্ষা বৰ্ষ নষ্ট নহয় বা যিকোনো উপায়েৰে ষান্মসিক পৰীক্ষাসমূহ অনুষ্ঠিত কৰিব পাৰে তাৰ প্ৰতি ব্যৱস্থা গ্ৰহণৰ বাবে আমি শিক্ষা মন্ত্ৰীক আহ্বান জনাইছো।”

ইয়াৰোপৰি, ল’কডাউনৰ সময়ছোৱাত ঘৰত থাকি কিছু সংখ্যক ছাত্ৰ ছাত্ৰী মানসিকভাৱে অসুস্থ হৈ পৰিছে বুলি উল্লেখ কৰি ত্ৰিনয়নে কয় ‘ছাত্ৰ ছাত্ৰী সকলৰ মানসিক স্বাস্থ্য যাতে সুদৃঢ় কৰিব পাৰি তাৰ বাবে মনোবিজ্ঞানী আৰু মনোবিজ্ঞান চিকিৎসকৰ দ্বাৰা কাউন্সিলিংৰ ব্যৱস্থা কৰিব লাগে।”

আনহাতে, ছাত্ৰ ছাত্ৰীসকলৰ হোষ্টেলৰ মাচুল ৫০ শতাংশ ৰেহাই দিয়াৰ ক্ষেত্ৰত শিক্ষা মন্ত্ৰীয়ে হোষ্টেল স্বত্ত্বাধিকাৰীক অনুৰোধ জনাইছিল যদিও ইয়াৰ বাবে চৰকাৰী নিৰ্দেশনা জাৰি কৰি চৰকাৰী আওতালৈ আনিবলৈ শিক্ষামন্ত্ৰীক তেওঁলোকে আহ্বান জনায়।

তদুপৰি, সমূহ শিক্ষানুষ্ঠান চেনিটাইজ কৰাৰ লগতে বিদ্যালয় মুকলি হোৱাৰ লগে লগে স্বাস্থ্য কৰ্মী নিয়োগ আৰু হেল্থ কিটৰ ব্যৱস্থা কৰিবলৈ আহ্বান জনায়।

আনহাতে, ৰাজ্য চৰকাৰে অনলাইন পাঠ্যক্ৰমৰ ব্যৱস্থা কৰিছে যদিও সকলো জিলাতে এইয়া বৰ্তমানো উপলব্ধ হোৱা নাই বুলি অভিযোগ তুলি ত্ৰিনয়নে কয়, “সকলো শ্ৰেণীৰ শিক্ষাৰ্থীয়ে সুবিধা পোৱাকৈ অনলাইন মাধ্যমেৰে বা অন্য মাধ্যমৰ জৰিয়তে শিক্ষা প্ৰদানৰ ব্যৱস্থা কৰিব লাগে।”

ইয়াৰ লগতে সকলো শিক্ষাৰ্থীয়ে পাঠ্যপুথি লাভ কৰাটো সুনিশ্চিত কৰিবলৈ তেওঁ আহ্বান জনায়।

উল্লেখযোগ্য যে, ল’কডাউনৰ দিনকেইটাত ছাত্ৰ সংগঠনটোৱে সমগ্ৰ ৰাজ্যতে প্ৰায় ৪০ হাজাৰ দুখীয়া পৰিয়ালক সাহায্য প্ৰদান কৰিছে।