কাইলৈৰ পৰা আৰম্ভ হ’ব মুখ্যমন্ত্ৰী শিশু সেৱা আঁচনি : কোন কোন অন্তৰ্ভুক্ত হ’ব এই আঁচনিত?

প্ৰধান মন্ত্ৰী নৰেন্দ্ৰ মোদীৰ শাসনৰ সপ্তম বৰ্ষপুৰ্তি উপলক্ষে এক চমকপ্ৰদ আঁচনি গ্ৰহণ কৰিছে ৰাজ্য চৰকাৰে।

কাইলৈৰ পৰা আৰম্ভ হ’বলগীয়া এই আঁচনিৰ নাম মুখ্যমন্ত্ৰী শিশু সেৱা আঁচনি বুলি এক সংবাদমেলযোগে জনায় ৰাজ্যৰ মুখ্যমন্ত্ৰী ড০ হিমন্ত বিশ্ব শৰ্মাই।

পিতৃ-মাতৃহাৰা বা ঘাটমাউৰা শিশু আৰু যুৱক-যুৱতীয়ে ৩৫০০ টকাকৈ মাহে লাভ কৰিব বুলি উল্লেখ কৰি তেওঁ লগতে কয় ‘সেইসকলৰ খুৰা-খুৰী পেহা পেহী বা অন্য কোনো অভিভাৱক থাকিব লাগিব। কোনো শিশুৰ পিতৃ মৃত্যু হৈছে বা মাতৃ জীয়াই আছে বা মাতৃৰ মৃত্যুৰ হৈছে পিতৃ জীয়াই আছে সেইসকলেও লাভ কৰিব এই আঁচনিৰ সুবিধা।‘

ইপিনে, যিসকল ছোৱালীৰ পৰিয়ালত কোনোৱে চোৱা চিতা কৰিবলৈ নাই সেইসকলক কোনো কস্তুৰবা গান্ধী বিদ্যালয়, নবোদয় বিদ্যালয় বা কোনো ব্যক্তিগত বিদ্যালয়ত চৰকাৰৰ খৰচত পঢ়োৱাৰ ব্যৱস্থা কৰা হ’ব আৰু আৱাসত ৰাখি পঢ়োৱা হ’ব বুলি মুখ্যমন্ত্ৰীয়ে সংবাদমেলত জনায়।

এইসকলৰ ভিতৰতে কাৰোবাক নাৰ্চ বা অন্য বৃত্তিমূলক শিক্ষা প্ৰদান কৰাৰ লগতে বিয়াৰ বাবে উপযুক্ত ছোৱালীক অৰুন্ধুতী আঁচনিৰ এটোলা সোণ আৰু ৫০ হাজাৰকৈ টকা প্ৰদান কৰা হ’ব বুলি মুখ্যমন্ত্ৰীয়ে সংবাদমেলত জনায়।

তেওঁ জনোৱা অনুসৰি মুখ্যমন্ত্ৰীৰ শিশু সেৱা আঁচনিৰ অন্তৰ্ভুক্ত সকলোকে একোটাকৈ লেপটপ বা কম্পিউটাৰ প্ৰদান কৰা হ’ব।

শিশু অধিকাৰ আয়োগক এই আঁচনিৰ কাম-কাজ নিয়ন্ত্ৰণৰ বাবে দায়িত্ব দিব বুলি তেওঁ জনায়।

মুখ্যমন্ত্ৰীয়ে জনোৱা অনুসৰি কাইলৈৰ দিনটোত ১০ হাজাৰ গাঁৱত বা বৃদ্ধাশ্ৰম, অনাথ আশ্ৰমত সেৱাই সংগঠন কাৰ্য্যসূচী ৰূপায়ণ কৰিব ভাৰতীয় জনতা পাৰ্টীয়ে।

এই আঁচনিৰ বাবে জিলা উপায়ুক্ত কাৰ্যালয় বা অনলাইনযোগে শিশুসকলে পঞ্জীয়ন কৰিব লাগিব বুলিও মুখ্যমন্ত্ৰীয়ে সংবাদ মেলত সদৰী কৰে।