নৰেন্দ্ৰ মোদীয়ে চাওলুং চ্যুকাফাৰ আদৰ্শ গ্ৰহণ কৰিছে : সৰ্বানন্দ সোণোৱাল

যোৰহাট লোকসভা সমষ্টি পুনৰ নিজৰ দখললৈ আনিবলৈ বিজেপিয়ে অব্যাহত ৰাখিছে ব্যাপক নিৰ্বাচনী প্ৰচাৰ। প্ৰতিদিনে বিজেপিৰ হাইপ্ৰফাইল নেতাই তপন গগৈৰ হৈ নিৰ্বাচনী প্ৰচাৰত নামি পৰিছে। দেওবাৰে মুখ্য মন্ত্ৰী সৰ্বানন্দ সোণোৱালে শিৱসাগৰৰ বেতবাৰীত এখন নিৰ্বাচনী সভাত অংশগ্ৰহণ কৰি বিজেপিক ভোট দিবলৈ আহ্বান জনায়।

নিৰ্বাচনী সভাত মুখ্য মন্ত্ৰীয়ে কয় যে দেশে স্বাধীনতা লাভ কৰা ৭০ বছৰ হ’ল যদিও স্বাধীনতাৰ সোৱাদ দেশৰ জনতাই যোৱা পাঁচ বছৰত প্ৰধান মন্ত্ৰী নৰেন্দ্ৰ মোদীৰ কাৰ্যকালতহে লাভ কৰিছে।

ইয়াৰ উপৰি ‘নৰেন্দ্ৰ মোদীয়ে এতিয়া চাওলুং চ্যুকাফাৰ আদৰ্শ গ্ৰহণ কৰিছে। চুকাফাই যিদৰে সমমৰ্য্যদা প্ৰদানেৰে এটা বৃহৎ অসমীয়া জাতি গঢ়ি তুলিছিল, ঠিক সেইদৰে নৰেন্দ্ৰ মোদীয়ে সকলো ৰাজ্যক আস্থা আৰু সমমৰ্য্যদা প্ৰদানেৰে শক্তিশালী ভাৰতবৰ্ষ গঢ়াত ব্ৰতী হৈছে।’ সোণোৱালে কয়।

আজিৰ সভাত তপন কুমাৰ গগৈ, সাংসদ কামাখ্যা প্ৰসাদ তাচা, বিজেপিৰ সভানেত্ৰী সুৰভি ৰাজকুঁৱৰী, অ’বি চি মৰ্চাৰ সভাপতি বিতুপন ৰাইদঙীয়াকে ধৰি ভালে সংখ্যক বিজেপিৰ নেতা কৰ্মী উপস্থিত থাকে।