ব্যৱসায়ীৰ ভোট বিচাৰি গণেশগুৰি বজাৰত বিজেপি সভাপতি ৰঞ্জিত দাস

নিৰ্বাচনৰ বতৰত চৌদিশে এতিয়া ৰাজনৈতিক দল তথা প্ৰাৰ্থীসকলৰ প্ৰচাৰ কাৰ্য্য তুংগত উঠিছে। প্ৰচাৰৰ বাবে বিভিন্ন জনে লৈছে বিভিন্ন পন্থা। তাৰ মাজতেই আজি গনেশগুৰি বজাৰত প্ৰচাৰ চলালে বিজেপিৰ ৰাজ্যিক সভাপতি ৰঞ্জিত দাসে।

দেওবাৰে বিয়লি বিজেপিৰ ৰাজ্যিক সভাপতি গৰাকীয়ে গুৱাহাটীৰ গণেশগুৰিত উপস্থিত হৈ ব্যৱসায়ীসকলৰ মাজত লোকসভা নিৰ্বাচনৰ বাবে দলৰ হৈ প্ৰচাৰ চলায়।

গোপাল বড়ো চৰকাৰী উচ্চতৰ মাধ্যমিক বিদ্যালয়ৰ খেলপথাৰৰ পৰা প্ৰচাৰ কাৰ্য আৰম্ভ কৰি দাসে গণেশগুৰিৰ পাচলি বজাৰ, মাছ বজাৰ, ফল-মূলৰ বজাৰৰ পৰা কাপোৰৰ বজাৰলৈ সকলো ব্যৱসায়িক প্ৰতিস্থানলৈ গৈ ব্যৱসায় সকলৰ লগত কথা পাতে আৰু বিজেপি আৰু মিত্ৰজোঁটক ভোট দিবলৈ আহ্বান জনায়।

এই প্ৰচাৰ অভিযানত ৰাজ্যিক সভাপতিগৰাকীক সংগ দিয়ে বিজেপিৰ অৰ্ধ শতাধিক কৰ্মীয়ে।

ইপিনে নিৰ্বাচনী প্ৰচাৰ চলাই বিভিন্ন ধৰণৰ লোকক লগ পাব পৰা সুন্দৰ স্থান হিচাপে বজাৰক অভিহিত কৰে ৰঞ্জিত দাসে। নিৰ্বাচনী সভালৈ যাব নোৱাৰা ব্যৱসায়ীকলৰ বাবেহে তেওঁ বজাৰলৈ অহা বুলিও মন্তব্য কৰে।

‘যি সময়ত নিৰ্বাচনী প্ৰচাৰৰ বাবে আমাৰ সভা অনুষ্ঠিত কৰা হয় সেই সময়ত ব্যৱসায়ীসকল ব্যৱসায়ত ব্যস্ত থাকে। তেওঁলোকক বজাৰলৈ আহি লগ পাব পাৰিছো। ইয়াৰ উপৰিও ৰাজনৈতিক-অৰাজনৈতিক সকলো ব্যক্তি, গ্ৰাহক আদিকো বজাৰত লগ পাব পাৰি। একেবাৰে তৃণমূল পৰ্যায়লৈ বাৰ্তা প্ৰেৰণ কৰিব পাৰি’, ৰঞ্জিত দাসে কয়।

উল্লেখযোগ্য যে ইয়াৰ পূৰ্বে ৰঞ্জিত দাসে শিৱসাগৰ, যোৰহাট আৰু তেজপুৰৰ বজাৰতো এইদৰে প্ৰচাৰ চলাইছিল। ইয়াৰ উপৰিও তেওঁ অসমৰ আন আন মুখ্য বজাৰসমূহতো প্ৰচাৰৰ বাবে যাবলৈ চেষ্টা চলাব বুলি জানিবলৈ দিয়ে।