ডিব্ৰুগড়ত কুৱাৰেণ্টাইন কেন্দ্ৰ পৰিদৰ্শন মুখ্য মন্ত্ৰী সোণোৱালৰ

অসমৰ মুখ্য মন্ত্ৰী সৰ্বানন্দ সোণোৱালে শুকুৰবাৰে ডিব্ৰুগড়ত চাৰিটা কুৱাৰেণ্টিন কেন্দ্ৰ পৰিদৰ্শন কৰে।

ডিব্ৰুগড়ৰ এম ডি কে কানৈ কলেজ, ডি এইচ এছ কে কলেজৰ ছোৱালীৰ হোষ্টেল, ডিকম পাৰ্বতী দেৱী এম ই স্কুলৰ কস্তুৰবা গান্ধী ছোৱালীৰ হোষ্টেল আৰু চাবুৱাৰ অসম বিদ্যাপীঠ হাই স্কুলত এই কুৱাৰেণ্টিন কেন্দ্ৰকেইটা স্থাপন কৰা হৈছে।

মুখ্য মন্ত্ৰী সোণোৱালে সকলোকে ক’ভিড-১৯ সম্পৰ্কীয় নীতি-নিৰ্দেশনা কঠোৰভাৱে বজাই চলিবলৈ আহ্বান জনায়।

কুৱাৰেণ্টিন হৈ থকা সকলকো তেওঁ কুৱাৰেণ্টিনৰ নীতি-নিয়ম ভংগ নকৰিবলৈ আহ্বান জনায়।

“কুৱাৰেণ্টিনৰ নিয়ম উলংঘনে অকল ৰোগীৰ ওপৰতে প্ৰভাৱ নেপেলায় বৰং সমগ্ৰ সমাজখনকে বিপদত পেলায় আৰু সেয়ে ঘৰ বা আনুষ্ঠানিক কুৱাৰেণ্টিনৰ নিয়ম উলংঘাকাৰীসকলৰ বিৰুদ্ধে ব্যৱস্থা লোৱাৰ বাহিৰে চৰকাৰৰ হাতত কোনো উপায় নাথাকে,” মুখ্য মন্ত্ৰীয়ে কয়।

তেওঁ লগতে কয় যে পঞ্চায়ত পৰ্য্যায়লৈকে কুৱাৰেণ্টিন কেন্দ্ৰ স্থাপন কৰাৰ বাবে ৰাজ্য চৰকাৰে পদক্ষেপ গ্ৰহণ কৰিছে।

বিশ্বজোৰা এই মহামাৰীৰ প্ৰাদুৰ্ভাৱ ৰোধ কৰাৰ বাবে চৰকাৰক সম্পূৰ্ণ সমৰ্থন আগবঢ়াবলৈ তেওঁ ৰাজ্যবাসীক আহ্বান জনায়।

অসমৰ বাহিৰত থকা লোকসকল সন্দৰ্ভত তেওঁ কয় যে ৰাজ্য চৰকাৰে দেশৰ বিভিন্ন প্ৰান্তত আবদ্ধ হৈ থকা লোকসকলক অসমলৈ ঘূৰাই অনাৰ বাবে সকলো প্ৰয়োজনীয় পদক্ষেপ গ্ৰহণ কৰিছে।

ক’ভিড-১৯ পজিটিভ ঘটনাৰ সংখ্যা বৃদ্ধি হোৱাটোত আতংকিত নহ’বলৈ ৰাইজক আহ্বান জনাই তেওঁ কয় যে পৰিস্থিতি মোকাবিলা কৰিবলৈ ৰাজ্য চৰকাৰ সম্পূৰ্ণৰূপে সক্ষম।