ৰাহুল গান্ধীৰ বিৰুদ্ধে মানহানিৰ গোচৰ ৰুজু কৰিব পাৰে হিমন্ত পুত্ৰ নন্দিলে!

কংগ্ৰেছৰ জ্যেষ্ঠ নেতা ৰাহুল গান্ধীৰ বিৰুদ্ধে মানহানিৰ গোচৰ ৰুজু কৰিব পাৰে অসমৰ মুখ্যমন্ত্ৰী হিমন্ত বিশ্ব শৰ্মাৰ পুত্ৰ নন্দিল বিশ্ব শৰ্মাই!

হিমন্ত বিশ্ব শৰ্মাৰ পৰিয়ালৰ বিৰুদ্ধে ৰাহুল গান্ধীয়ে কৰা মন্তব্যৰ বাবেই নন্দিল বিশ্ব শৰ্মাই গান্ধীৰ বিৰুদ্ধে মানহানিৰ গোচৰ ৰুজু কৰাৰ সম্ভাৱনা আছে বুলি জানিব পৰা গৈছে।

উল্লেখ্য যে, চলিত ভাৰত জোড়ো ন্যায় যাত্ৰা অসমত প্ৰৱেশ কৰাৰ পিছতে যোৱা ১৮ জানুৱাৰীত ৰাহুল গান্ধীয়ে অসমৰ মুখ্যমন্ত্ৰী হিমন্ত বিশ্ব শৰ্মাক তীব্ৰ সমালোচনা কৰিছিল।

কংগ্ৰেছ নেতাগৰাকীয়ে হিমন্ত বিশ্ব শৰ্মাক ভাৰতৰ ভিতৰতে সৰ্বাধিক দুৰ্নীতিগ্ৰস্ত মুখ্যমন্ত্ৰী আখ্যা দি তেওঁ আন বিজেপি নেতাক দুৰ্নীতিৰ শিক্ষা দিব পাৰে বুলি কটাক্ষ কৰিছিল।

ৰাহুল গান্ধীয়ে লগতে নিজ বক্তব্যৰ মাজতে হিমন্ত বিশ্ব শৰ্মাৰ সন্তানকে ধৰি সমগ্ৰ পৰিয়াল দুৰ্নীতিৰ সৈতে জড়িত বুলি অভিযোগ তুলিছিল।

গান্ধীৰ এই মন্তব্যৰ বাবে হিমন্ত বিশ্ব শৰ্মাৰ পুত্ৰ নন্দিল বিশ্ব শৰ্মাই কংগ্ৰেছ নেতাগৰাকীৰ বিৰুদ্ধে গোচৰ ৰুজু কৰিব পাৰে বুলি খবৰ প্ৰকাশ পাইছে।

ইফালে ৰাহুল গান্ধীৰ এই মন্তব্যৰ পিছতে মুখ্যমন্ত্ৰী হিমন্ত বিশ্ব শৰ্মাই ৰাহুল গান্ধীক প্ৰত্যুত্তৰ দি গান্ধী পৰিয়ালক দেশৰ সৰ্বাধিক দুৰ্নীতিগ্ৰস্ত পৰিয়াল বুলি মন্তব্য কৰিছিল।