এনআৰচিৰ ৫টা নথি বাদ দিয়াৰ বাবে সমন্বয়ক হাজেলাক ভৰ্ৎসনা প্ৰদেশ কংগ্ৰেছৰ

আজি অসম কংগ্ৰেছে এনআৰচিত অন্তভুক্তিৰ বাবে নিৰ্দিষ্ট ৰখা ১৫টা নথিৰ পৰা ৫টা নথি বাদ দিয়াৰ বাবে ৰাষ্ট্ৰীয় নাগৰিক পঞ্জীৰ সমন্বয়ক প্ৰতীক হাজেলাক দোষাৰোপ কৰিছে।

সংবাদ মাধ্যমৰ আগত অসম কংগ্ৰেছৰ সভাপতি ৰিপুন বৰাই প্ৰশ্ন কৰে ‘তালিকাভুক্ত ১৫টা নথিৰ পৰা অসাংবিধানিকভাৱে ৫টা নথি বাদ দি কি সাহসত প্ৰতীক হাজেলাই সৰ্বোচ্চ ন্যায়ালয়ত শপতনামা দাখিল কৰিছে?’

তেওঁ প্ৰতীক হাজেলাই সৰ্বোচ্চ ন্যায়ালয়ত দাখিল কৰা শপতনামা ৰদ কৰাৰ দাবী জনায়।

ৰদ হোৱা ৫বিধ নথি হৈছে ১৯৫১ৰ এনআৰচি, ১৯৭১ৰ ভোটাৰ তালিকা, নাগৰিক প্ৰমাণপত্ৰ, শৰণাৰ্থী প্ৰমাণপত্ৰ আৰু ৰেচনকাৰ্ড।

বিজোপিৰ মিছা প্ৰতিশ্ৰুতি সন্দৰ্ভত বৰাই কৈছে যে নিৰ্বাচনৰ পূৰ্বে প্ৰতিশ্ৰুতিৰে ৰাইজক দলটোৱে বিভ্ৰাম্ত কৰিছে। ২০১৪ৰ লোকসভা আৰু ২০১৬ৰ বিধানসভা নিৰ্বাচনৰ পূৰ্বে প্ৰদান কৰা প্ৰতিশ্ৰুতি ৰক্ষা কৰাত কেন্দ্ৰ আৰু ৰাজ্যত বিজেপি চৰকাৰ সম্পূৰ্ণ ব্যৰ্থ হৈছে।

তেওঁ আৰু কৈছে যে গেৰুৱা দলটোৰ নিৰ্বাচনৰ পূৰ্বৰ শ্লোগান ‘জাতি, মাটি, ভেটি’  ভোট মেৰুকৰণ কৰাৰ বাবে ব্যৱহাৰ কৰা এটা চমকত বাবে একো নহয়। এতিয়া ৰাজ্য চৰকাৰে কেন্দ্ৰ চৰকাৰৰ ওচৰত আঁঠু কাঢ়ি থাকিবলগীয়া হৈছে বুলিও কংগ্ৰেছ সভাপতিগৰাকীয়ে মন্তব্য কৰে।

বৰাই আৰু কৈছে যে খিলঞ্জীয়ৰ স্বাৰ্থত এনআৰচি সন্দৰ্বত দলটোৱে এটা কঠোৰ স্থিতি গ্ৰহণ কৰিছে।

অগপ দলক ক্ষমতালোভী বুলি আখ্যায়িত কৰি বৰাই কয়, ‘‘যদিহে দলটো ক্ষমতালোভী নহয়, তেন্তে এতিয়াই মৰ্চাৰ পৰা আঁতৰি আহক। এতিয়া আৰু ্পেক্ষা কৰাৰ কোনো কাৰণ নাই।’’