বান পৰিস্থিতিৰ অধিক অৱনতি; কাজিৰঙাত ৩৭ নং ৰাষ্ট্ৰীয় ঘাইপথেৰে যাতায়ত বন্ধ

ক্ৰমাৎ অধিক অৱনতি ঘটিবলৈ ধৰিছে ৰাজ্যৰ বান পৰিস্থিতি। শেহতীয়াভাৱে বানৰ ফলত উজনি আৰু নামনি অসমৰ যোগাযোগ বিচ্ছিন্ন হৈ পৰাৰ উপক্ৰম ঘটিছে।

উল্লেখযোগ্য যে প্ৰবল বানে কাজিৰঙা ৰাষ্ট্ৰীয় উদ্যানৰ সমীপৰ বিভিন্ন স্থানত ৩৭ নং ৰাষ্ট্ৰীয় ঘাইপথ বুৰাই পেলোৱাৰ লগতে ৩ ফুট ওপৰেৰে পানী বৈ যোৱাত ঘাইপথছোৱাত স্থগিত কৰা হৈছে লঘু যান-বাহনৰ চলাচল।

কলিয়াবৰৰ ভাৰপ্ৰাপ্ত মহকুমাধিপতি বিতুপন নেওগে জাৰি কৰা এক নিৰ্দেশ মতে আজিৰ পৰা আৰোপ কৰা এই নিৰ্দেশ পৰৱৰ্তি জাননি প্ৰকাশ নকৰালৈকে বাহাল থাকিব।

বানৰ ফলত ঘাইপথছোৱাত যাতে কোনোধৰণৰ অবাঞ্চিত ৰ্ঘটনা সংঘটিত নহয় তাৰ প্ৰতি লক্ষ্য ৰাখিয়েই এই ব্যৱস্থা গ্ৰহণ কৰা হৈছে বুলি মহকুমা প্ৰশাসনৰ পৰা জাৰি কৰা বিবৃতিটোত উল্লেখ কৰা হয়।

নিৰ্দেশ অনুসৰি নগাঁও ফালৰ পৰা অহা বাহনসমূহ জখলাবন্ধাত ৰখাব লাগিব আৰু যোৰহাটৰ দিশৰ পৰা অহা বাহনসমূহ বোকাখাতত ৰ’ব লাগিব।

উল্লেখযোগ্য যে, বিগত সপ্তাহৰ পৰা অসমৰ বানপৰিস্থিতিয়ে ভয়াবহ ৰূপ ধাৰণ কৰিছে আৰু এই বানত ২৮ খন জিলাৰ ৩১৮১ গাঁৱৰ প্ৰায় ২৬,৪৫,৫৩৩ গৰাকী লোক আক্ৰান্ত হৈছে।