যোৰহাটৰ চিনামৰা জাতীয় বিদ্যালয়ৰ অধ্যক্ষক নিয়াৰ চমন
যোৰহাটৰ চিনামৰা জাতীয় বিদ্যালয়ৰ অধ্যক্ষ দিব্যজ্যোতি শৰ্মাক ৰাষ্ট্ৰীয় তদন্তকাৰী সংস্থাই সোমবাৰে সোধপোচৰ বাবে চমন জাৰি কৰিছে।
তেওঁক ভাৰতীয় দণ্ডবিধিৰ ১২০এ, ১২৪বি, ১৫৩এ, ১৫৩বি আৰু বেআইনী কাৰ্য্যকলাপ প্ৰতিৰোধ আইনৰ ১৮/৩৯ ধাৰাত গোচৰ নং ১৩/২০১৯ৰ সংক্ৰান্তত চমন জাৰি কৰা হৈছে।
কৃষক মুক্তি সংগ্ৰাম সমিতিৰ সৈতে জৰিত শৰ্মাক কা-বিৰোধী প্ৰতিবাদৰ মাজতে যোৱা ১২ ডিচেম্বৰত গ্ৰেপ্তাৰ কৰা হৈছিল।
কৃষক মুক্তিৰ নেতা অখিল গগৈৰ সৈতে গ্ৰেপ্তাৰ হোৱা শৰ্মাক পিছত মহকুমা আদালতে জামিন প্ৰদান কৰিছিল।
শৰ্মাই কয় যে কা-বিৰোধিতাত সক্ৰিয়ভাৱে জৰিত থকাৰ বাবে তেওঁক গ্ৰেপ্তাৰ কৰা হৈছিল।
“ৰাজ্যত কা-ৰ বিৰুদ্ধে প্ৰতিবাদ শক্তিহীন কৰাৰ বাবে ইয়াৰ নীতিৰ বিৰুদ্ধে মাত বন্ধ কৰাৰ বাবে চৰকাৰে লোৱা দমনমূলক ব্যৱস্থাৰ ই ধাৰাবাহিকতা,” শৰ্মাই কয়।