দেশীয় সুৰাক লৈ চৰকাৰৰ বিৰুদ্ধে বিধানসভাত আক্ৰমণাত্মক কংগ্ৰেছ : সদন স্থগিত ৰখাৰ নিৰ্দেশ অধ্যক্ষৰ
যোৰহাট আৰু গোলাঘাট জিলাত বিষাক্ত সুৰাপান কৰি ডেৰশতাধিক লোকৰ মৃত্যু হোৱা প্ৰসংগক লৈ আজি উত্তাল হৈ পৰে অসম বিধানসভাৰ মজিয়া। বিৰোধী দল কংগ্ৰেছে সদনৰ ভিতৰত প্লেকাৰ্ড লৈ চৰকাৰৰ বিৰুদ্ধে তীব্ৰ প্ৰতিবাদ সাব্যস্ত কৰে।
কংগ্ৰেছৰ বিধায়ক ৰকিবুল হুছেইনে অধ্যক্ষক সমগ্ৰ ঘটনাক কেন্দ্ৰ কৰি বিধানসভা স্থগিত ৰখাৰ প্ৰস্তাৱ দিয়ে। প্ৰথম অৱস্থাত বিধানসভাৰ অধ্যক্ষই ৰকিবুল হুছেইনৰ এই প্ৰস্তাৱ অগ্ৰাহ্য কৰে যদিও বিৰোধী দল সমূহৰ প্ৰতিবাদৰ বাবে ১০.৩০ বজালৈ সদন স্থগিত ৰখাৰ নিৰ্দেশ দিয়ে।
আনহাতে, ঘটনা সন্দৰ্ভত আজি বিধান সভাৰ অধ্যক্ষই সকলো ৰাজনৈতিক দলৰ দলপতিৰে সৈতে পৃথকে পৃথকে আলোচনাত মিলিত হ’ব।
উল্লেখযোগ্য যে, কংগ্ৰেছৰ বিধায়ক ৰূপজ্যোতি কুৰ্মী আজি চৰকাৰ আৰু হিমন্ত বিশ্ব শৰ্মাৰ বিৰুদ্ধে যথেষ্ট আক্ৰমণাত্মক হৈ পৰে। বিশেষ কাৰ্য্যসূচী লৈ ডিমা হাচাও ভ্ৰমণলৈ যোৱা হিমন্ত বিশ্ব শৰ্মা সম্পৰ্কত মন্তব্য কৰি কুৰ্মীয়ে ‘স্বাস্থ্য মন্ত্ৰীক মাতক, বিজেপিয়ে মানুহ মাৰিছে কংগ্ৰেছে মৰা নাই’ বুলি ক্ষোভ উজাৰে।
ৰূপজ্যোতি কুৰ্মীৰ আক্ৰমণৰ প্ৰত্যুত্তৰ দি চৰকাৰী পক্ষৰ মন্ত্ৰী পল্লৱলোচন দাসে ঘটনা সংঘটিত স্থানৰ পৰা কোন দলৰ জনপ্ৰতিনিধিয়ে প্ৰতিনিধিত্ব কৰিছে বুলি ওলোটাই প্ৰশ্ন কৰাৰ লগতে ৰাজনীতি বিজেপিয়ে নহয় কংগ্ৰেছেহে কৰিছে বুলি মন্তব্য কৰে।
গোলাঘাট আৰু যোৰহাটত সংঘটিত ঘটনাক অতিশয় দুৰ্ভাগ্যজনক আখ্যা দি মন্ত্ৰী চন্দ্ৰমোহন পাটোৱাৰীয়ে স্পৰ্শকাতৰ বিষয়টোত ৰাজনীতি নকৰি মানৱীয় দৃ্ষ্টিভংগীৰে সদনৰ মজিয়াত আলোচনা হ’ব লাগে বুলি কয়। ধিং সমষ্টিৰ এ আই য়ু ডি এফৰ বিধায়ক আমিনুল ইছলামে বিধানসভাৰ সকলো কাৰ্য্যসূচী বাতিল কৰি বিষাক্ত সুৰাৰ ওপৰত চৰ্চা কৰাৰ বাবে অধ্যক্ষৰ ওচৰত দাবী জনায়।