নাৰ্ছ সন্থাৰ আন্দোলন স্থগিত : সভানেত্ৰীৰ বিৰুদ্ধে ধন লৈ ৰাতিটোৰ ভিতৰতে মেনেজড হোৱাৰ অভিযোগ

চৰকাৰৰ ষড়যন্ত্ৰৰ ফলত অৱশেষত আন্দোলনৰত সদৌ অসম নাৰ্ছ সন্থা দুটা গোটত ভাগ হৈ যোৱাই নহয়, দুয়োটা সমগ্ৰ আন্দোলনটোৱেই সাময়িকভাৱে স্থগিত ৰাখিব লগীয়া হৈছে।

কেৱল সেয়াই নহয়, খোদ সভানেত্ৰীৰ বিৰুদ্ধে ধনৰ বিনিময়ত মেনেজড হোৱাৰ অভিযোগ আনিলে সতীৰ্থ নাৰ্ছসকলেই।

উল্লেখযোগ্য যে যোৱা ২৬ নৱেম্বৰৰ পৰা সদৌ অসম নাৰ্ছ সন্থাই বিভিন্ন দাবীত অনিৰ্দিষ্টকালীন কৰ্মবিৰতি পালন কৰি আছিল।  কিন্তু আপোচ নকৰো বুলি কৈ কৰা আন্দোলন হঠাতে স্থগিত ৰাখে।

সন্থাই জনোৱামতে, আজি বিয়লি ২ বজাৰ পৰা সাময়িকভাৱে স্থগিত ৰখা হৈছে সদৌ নাৰ্ছ সন্থাৰ অনিৰ্দিষ্টকালীন কৰ্মবিৰতি কাৰ্যসূচী। ২৯ নৱেম্বৰত ৰাজ্য চৰকাৰৰ স্বাস্থ্য বিভাগৰ প্ৰধান সচিব সমীৰ সিনহাৰ সৈতে হোৱা আলোচনাৰ পাছত আজি সন্থাই এই সিদ্ধান্ত গ্ৰহণ কৰা বুলি জনায় সন্থাই।

গুৱাহাটীৰ লক্ষীৰাম বৰুৱা সদনত অনুষ্ঠিত এখন কাৰ্যনিৰ্বাহক সভাৰ জৰিয়তে সন্থাই এই সিদ্ধান্ত গ্ৰহণ কৰে। কাৰ্যনিৰ্বাহক সভাৰ পাছতেই এখন সংবাদমেল যোগে সন্থাৰ সাধাৰণ সম্পাদিকা জুনু চুতীয়া দিহিঙীয়াই সিদ্ধান্তসমূহৰ বিষয়ে জানিবলৈ দিয়ে।

সম্পাদিকা দিহিঙীয়াই জানিবলৈ দিয়া মতে অহা ৪ ডিচেম্বৰত চৰকাৰৰ সৈতে সন্থাৰ আলোচনা হোৱাৰ কথা আছে। দৰমহাৰ গাঁথনিত থকা আঁসোৱাহ দূৰ কৰাৰ সন্দৰ্ভত আলোচনা হ’ব বুলিও তেওঁ জানিবলৈ দিয়ে। তদুপৰি, ষ্টাফ নাৰ্ছৰ ছাৰ্ভিচ ৰুল সম্পৰ্কতো আলোচনা হ’ব। অৱশ্যে অলোচনাৰ সন্দৰ্ভত সংগঠনটোক কেৱল মৌখিকভাৱেহে জনোৱা হৈছে বুলি সাধাৰণ সম্পাদিকাগৰাকীয়ে জনায়।

আনহাতে, আজিৰ কাৰ্যনিৰ্বাহকত উপস্থিত নাথাকিল সভানেত্ৰী অঞ্জনা শইকীয়া। শাৰীৰিক অসুস্থতাৰ বাবে তেওঁ উপস্থিত নাই বুলি সাধাৰণ সম্পাদিকাই জানিবলৈ দিয়ে যদিও এক সূত্ৰৰ পৰা পোৱা খবৰ অনুসৰি তেওঁ পদত্যাগ কৰিছে।

এই সন্দৰ্ভত সাধাৰণ সম্পাদিকাই কয়, ’’সংবাদ মাধ্যমৰ আগত সভানেত্ৰীয়ে পদত্যাগ কৰিলে নহ’ব কৰ্ণধাৰ কমিটীক পদত্যাগ পত্ৰ দিব লাগিব।‘’

নাৰ্ছ সন্থাৰ মাজত বিভাজন অনাৰ বাবে চৰকাৰৰ ষড়যন্ত্ৰ থকাৰ সন্দেহ প্ৰকাশ কৰিছে নাৰ্ছ সন্থাৰ খোদ সাধাৰণ সম্পাদিকাই। তেওঁ অভিযোগ কৰে যে প্ৰশাসনৰ ফালৰ পৰা ভয়-ভীত প্ৰদৰ্শন কৰা হৈছে সন্থাৰ নাৰ্ছক।

তেওঁ কয় যে আন্দোলনৰ বাবে ৰোগীৰ কি গতি হৈছে সেয়া নাৰ্ছসকলে অনুভৱ কৰিব পাৰিছে। সংবাদ মাধ্যমৰ আগত স্বাস্থ্য বিভাগৰ মন্ত্ৰীয়ে স্বাস্থ্য বিভাগ সুচাৰূপে চলাই আছে বুলি মিছা আৰু ভুৱা প্ৰচাৰ চলাই আছে বুলিও সম্পাদিকাগৰাকীয়ে কয়।

আনহাতে, সভানেত্ৰীৰ বিৰুদ্ধে আন্দোলন স্থগিত ৰাখিবলৈ ধন লোৱাৰ গুৰুতৰ অভিযোগ তোলে সাধাৰণ সম্পাদিকাই। সভানেত্ৰীৰ লগত নীলিমা শইকীয়া আৰু মঞ্জু শইকীয়া উপস্থিত আছিল বুলিও তেওঁ জানিবলৈ দিয়ে।

“সভানেত্ৰীয়ে যদি চৰকাৰী পক্ষৰ লগত মিতিৰালি কৰি নিজৰ পকেট গৰম কৰিব বিচাৰিছে তেনেহ’লে তেওঁ ধ্বংস হ’ব।” সম্পাদিকাগৰাকীয়ে কয়।

সম্পাদিকাগৰাকীয়ে পৰৱৰ্তী তাৰিখত হ’ব লগীয়া আলোচনাৰ জৰিয়তে সন্থাই প্ৰাপ্য দাবী নাপালে আন্দোলন চলাই নিয়াৰ হুংকাৰ দিয়ে। নিজৰ ন্যায্য প্ৰাপ্তিৰ বাবে তেওঁলোকে আন্দোলন চলাই নিব বুলিও স্পষ্ট কৰি দিয়ে।

অৱশ্যে, সাধাৰণ সম্পাদিকা জুনু চুতীয়া দিহিঙীয়াই ২৯ নৱেম্বৰৰ আলোচনা সৌহাৰ্দ্যপূৰ্ণ বুলি মন্তব্য কৰিছে। সেইবাবে ৰোগীৰ স্বাৰ্থত আন্দোলন সাময়িকভাৱে স্থগিত ৰাখিছে বুলি জানিব দিয়ে।