শিৱসাগৰৰ দুটা কেন্দ্ৰত পুনৰ ভোট গ্ৰহণ পঞ্চায়ত নিৰ্বাচনৰ

৫ ডিচেম্বৰত অনুষ্ঠিত অসমৰ পঞ্চায়ত নিৰ্বাচনৰ প্ৰথম পৰ্য্যায়ৰ ভোট গ্ৰহণত বেলট পে’পাৰ বিসংগতিৰ বাবে বাতিল হোৱা শিৱসাগৰ জিলাৰ দুটা কেন্দ্ৰত শুকুৰবাৰে সুকলমে অনুষ্ঠিত হয় পুনৰ ভোট গ্ৰহণ।

দুয়োটা কেন্দ্ৰত পুৱা ৭ বজাৰ পৰা পৰা আৰম্ভ হোৱা ভোট গ্ৰহণ বিয়লি ৩ বজাত সমাপ্ত হয়।

জিলাখনৰ আমগুৰি বিধানসভাৰ সমষ্টিৰ অন্তৰ্গত ১৩নং দোপদৰ জিলা পৰিষদৰ ৮৪নং কুকুৰাচোৱা প্ৰাথমিক বিদ্যালয়ৰ ভোট গ্ৰহণ কেন্দ্ৰত মুঠ ভোটাৰ ৫১৫ জনৰ ৩৯২ গৰাকীয়ে শুকুৰবাৰে ভোটদান কৰে। ভোটদানৰ হাৰ আছিল ৭৬.১১ শতাংশ।

লগতে পঢ়ক– অসমৰ ক’ত কেতিয়া পুনৰ ভোট গ্ৰহণ? পঞ্চায়ত নিৰ্বাচনত খেলিমেলি স্বীকাৰ ৰাজ্যিক আয়ুক্তৰ

আনহাতে  ৮৯নং পুৰণি লোণপুৰীয়া প্ৰাথমিক বিদ্যালয়ৰ ভোটগ্ৰহণ কেন্দ্ৰত ৪৫১গৰাকী ভোটাৰৰ ৩৭৪ গৰাকীয়ে ভোটদান কৰে। কেন্দ্ৰটোত ভোটদানৰ হাৰ ৮২.০৯ শতাংশ।

৫ ডিচেম্বৰত অনুষ্ঠিত হোৱা প্ৰথম পৰ্য্যায়ৰ পঞ্চায়ত নিৰ্বাচনত এই দুটা ভোট কেন্দ্ৰত আন কেন্দ্ৰৰ বেলট পে’পাৰ ভোটাৰে ব্যৱহাৰ কৰা বুলি শিৱসাগৰ জিলা উপায়ুক্তই প্ৰতিবেদন দিছিল।