আলফা (স্বাঃ)ৰ হাতৰ পৰা পুতেকক আনিবলৈ গৈ সেনাৰ হাতত আটক দেউতাক

তিনিচুকীয়া জিলাৰ জাগুনৰ পৰা আলফা স্বাধীনে অপহৰণ কৰা এটা শিলভঙা উদ্যোগৰ মেনেজাৰ অপূৰ্ব কাকতীক(৩০) আজি মুকলি কৰি দিয়া বুলি খবৰ ওলাইছে যদিও এতিয়াও ইয়াৰ সত্যতা স্পষ্ট হোৱা নাই।

ইয়াৰ বিপৰীতে আলফা (স্বাঃ)ই মুকলি কৰি দিছে বুলি খবৰ পাই পুতেকক আনিবলৈ যোৱা অপূৰ্ব কাকতীৰ দেউতাক আৰু অপূৰ্বই চাকৰি কৰা শিল উদ্যোগটোৰ মালিক বিজয় বৰাক জয়ৰামপুৰত সেনাই আটক কৰা বুলিহে নিশ্চিত খবৰ আহিছে।

উল্লেখযোগ্য যে অপূৰ্ব কাকতীক যোৱা যোৱা ১৯ নৱেম্বৰত আলফা (স্বাঃ)ই অপহৰণ কৰিছিল। অপহৰণকাৰীয়ে কাকতীৰ মুক্তিৰ বিনিময়ত বৃহৎ পৰিমাণৰ ধন দাবী কৰি আহিছিল। উদ্যোগটোৰ স্বত্বাধিকাৰ বিজয় বৰাক ফোন যোগে আলফা স্বাধীনৰ নেতা নয়ন মেধিয়ে অপূৰ্বক অপহৰণ কৰা বুলি অৱগত কৰি ধন দাবী কৰিছিল।

ইফালে আজি আলফা স্বাধীনে নিজৰ অপূৰ্বক মুকলি কৰি দিয়া বুলি খবৰ পাই পুত্ৰক আনিবলৈ গৈছিল বুলি জানিব পৰা গৈছে। অৰুণাচলৰ নামপং অভিমুখে যাবলৈ ওলাওঁতে দুয়োকে জয়ৰামপুৰত আটক কৰি আছাম ৰাইফলছে সোধা-পোছা কৰি থকা বুলি জানিব পৰা গৈছে।

সন্দেহ কৰা মতে, অপূৰ্বৰ মুক্তিৰ বিনিময়ত আলফা(স্বাঃ) যথেষ্ট পৰিমাণৰ ধন দিয়াৰ সম্ভাৱনা আছে।

অপূৰ্বক আলফা স্বাধীনে মুকলি কৰি দিছে নে নাই জানিবলৈ নৰ্থ-ইষ্ট নাওৰ তৰফৰ পৰা যোগাযোগ কৰাত অসম আৰক্ষী আৰু অৰুণাচল আৰক্ষীয়ে স্পষ্ট কৰা নাই৷

অন্য এটা সূত্ৰই দাবী কৰা অনুসৰি ভাৰত-ম্যানমাৰ সীমান্তত অপূৰ্ব কাকতীক আলফাই মুকলি কৰি দিছে আৰু পুৱাহে উদ্ধাৰ অভিযান চলাব পৰা যাব৷