ভেকো-ভাওনা হ’ব নেকি SI কেলেংকাৰিৰ তদন্ত! : CIDৰ জেৰাৰ অন্তত হঠাৎ ৰহস্যজনক অন্তৰ্ধান সঞ্জীত কৃষ্ণৰ
কালিৰে পৰা হঠাৎ অন্তৰ্ধান হ’ল SI কেলেংকাৰীৰ অন্যতম অভিযুক্ত আৰক্ষী বিষয়া সঞ্জীত কৃষ্ণ।
কোনো গোপন ঠাইত আত্মগোপন কৰি থকাৰ সন্দেহ কৰিছে CID-এ। কিন্তু বৰ্তমানলৈকে কোনো খবৰ বা শুং সূত্ৰ লাভ কৰা নাই সঞ্জীতৰ।
উল্লেখযোগ্য যে, সোমবাৰৰ পৰা CID কাৰ্যালয়ত জেৰা চলোৱা হৈছিল কৰিমগঞ্জৰ প্ৰাক্তন আৰক্ষী অধীক্ষক গৰাকীক।
CIDৰ উচ্চ পদস্ত বিষয়া আৰু আৰক্ষীৰ অতিৰিক্ত সঞ্চালক প্ৰধান GP সিঙে পৃথকে পৃথকে সঞ্জীতক জেৰা চলাইছিল বুলি সূত্ৰত প্ৰকাশ পাইছিল।
সঞ্জীতৰ পৰা আৰক্ষীয়ে ইতিমধ্যে দুটাকৈ মোবাইল জব্দ কৰিছে বুলি জানিব পৰা গৈছে।
কিন্তু কালি দুপৰীয়া ভাগৰ পৰা CIDৰে সংযোগ বিচ্ছিন্ন হয় সঞ্জীতৰ।
কৰিমগঞ্জৰ আৰক্ষী অধীক্ষকৰ কাৰ্যালয়ৰ পৰাই প্ৰশ্ন কাকত ফাদিল হোৱা বুলি ইতিমধ্যে CIDৰ আগত অক্ষয় টেলি কমিউনিকেশ্যনৰ ৰুবুল হাজৰিকাই স্বীকাৰোক্তি দিছে বুলি সূত্ৰত প্ৰকাশ পাইছে।
অভিযোগ অনুসৰি ৪০ লাখ টকাৰ বিনিময়ত ৰুবুলক প্ৰশ্নকাকত ফটো মাৰি লোৱাৰ অনুমতি দিছিল সঞ্জীতে। সেই ফটো দিবন ডেকালৈ হোৱাটছএপ যোগে ৰুবুল হাজৰিকাই প্ৰেৰণ কৰিছিল বুলিও খবৰ প্ৰকাশ পাইছে।
CID-এ সঞ্জীত কৃষ্ণৰ হাউচ গাৰ্ড, তিনি কনিষ্টবল, দত্ত উপাধিধাৰী কৰিমগঞ্জৰ ট্ৰেফিক SIৰ স্বীকাৰোক্তি বা জবানবন্দী সঞ্জীতৰ বিৰুদ্ধে প্ৰমাণ হিচাপে দাখিল কৰিব বুলি সূত্ৰত প্ৰকাশ পাইছে।
কিন্তু তাৰ পাছতো হঠাৎ CIDৰ জেৰাৰ অন্তত ৰহস্যজনক অন্তৰ্ধান কুমাৰ সঞ্জীত কৃষ্ণৰ।
সন্ত্ৰাসবাদী নাইবা উগ্ৰপন্থী তথা দুৰ্নীতিৰ মাষ্টাৰ মাইণ্ডসকলক গাঁৱৰ ভিতৰুৱা অঞ্চলৰ পৰা আটক কৰিবলৈ সক্ষম হোৱা আৰক্ষী নাইবা CID-এ ইমানখিনি তথ্য প্ৰমাণ সঞ্জীতৰ বিৰুদ্ধে থকাৰ পাছতো কিয় সঞ্জীতক নজৰত নাৰাখিলে ?
নে তেওঁক আত্মগোপনৰ সুযোগ বা সুবিধা কৰি দিয়া হ’ল নেকি বুলি প্ৰশ্ন কৰিছে একাংশই।
বৰ্তমান সঞ্জীত কৃষ্ণৰ আত্মগোপনৰ বিষয়টো সম্পূৰ্ণ ৰহস্যৰ আৱৰ্তত সোমাই পৰিছে।
কালি বিয়লি প্ৰায় ৪ বজাৰ পৰা উলুবাৰী লাচিতনগৰস্থিত সঞ্জীত কৃষ্ণৰ বাসগৃহত CIDৰ এটা দলে অভিযান চলাই যদিও তেওঁৰ সাক্ষাৎ নাপায় কেৱল বাহনখনহে ঘৰত পায়।
উল্লেখ্য যে যোৱা ১১ অক্টোবৰত কুমাৰ সঞ্জিত কৃষ্ণক কৰিমগঞ্জৰ পৰা বৰপেটাৰ এফ আৰ আৰ অ’ৰ আৰক্ষী অধীক্ষক হিচাপে বদলি কৰে। সূত্ৰ অনুসৰি, সঞ্জিত কৃষ্ণক শাস্তিমূলকভাৱে এই গুৰুত্বহীন পদটোলৈ বদলি কৰা হয়।