ৰবি শৰ্মাৰ পাছত তেওঁৰ অভিনেত্ৰী পত্নীৰো যোগদান বিজেপিত

অভিনেতা ৰবি শৰ্মাৰ পাছত তেওঁৰ অভিনেত্ৰী পত্নী মৈত্ৰেয়ী প্ৰিয়দৰ্শিনীয়ে মঙলবাৰে বিজেপিত যোগদান কৰে।

মঙলবাৰে অসম বিজেপিৰ ৰাজ্যিক সভাপতি ৰঞ্জিত দাসৰ উপস্থিতিত অভিনেত্ৰী মৈত্ৰেয়ীৰ লগতে ভালেকেইগৰাকী অসমীয়া বোলছবিজগতৰ অভিনেতা-অভিনেত্ৰীয়ে বিজেপিত আনুষ্ঠানিকভাৱে যোগদান কৰে।

বিজেপিত যোগদান কৰা অসমীয়া চলচ্চিত্ৰজগতৰ আগশাৰীৰ কলা-কুশলীৰ ভিতৰত উদয় শংকৰ আৰু আহিৰ ভৈৰৱ উল্লেখযোগ্য।

লগতে পঢ়ক : বিজেপিত যোগদান অসমীয়া চলচ্চিত্ৰৰ জনপ্ৰিয় অভিনেতা ৰবি শৰ্মাৰ

আনহাতে, সদৌ গুৱাহাটী ছাত্ৰ সন্থাৰ প্ৰাক্তন সাধাৰণ সম্পাদক মনোজ দাসেও মঙলবাৰে আনুষ্ঠানিকভাৱে বিজেপিত যোগদান কৰে।

ছাত্ৰ সন্থাৰ প্ৰাক্তন সদস্যৰ লগতে গোৰ্খা উন্নয়ণ পৰিষদ,শৰণীয়া কছাৰী উন্নয়ণ পৰিষদৰো ভালেকেইগৰাকী সদস্যই মঙলবাৰে আনুষ্ঠানিকভাৱে গেৰুৱা দলটোৰ সদস্য পদ গ্ৰহণ কৰে।

ৰাজ্যিক বিজেপিৰ সভাপতি ৰঞ্জিত দাসৰ লগতে দলৰ সাংগঠনিক সম্পাদক ফনীন্দ্ৰ নাথ শৰ্মাই নতুনকৈ বিজেপিত যোগদান কৰা সদস্য সকলক দললৈ স্বাগতম জনায়।

সদস্য ভৰ্তি অনুষ্ঠানত ৰঞ্জিত দাসে অসমৰ প্ৰতিটো পৰিয়ালৰ কমেও এগৰাকী ব্যক্তিক বিজেপিৰ সদস্য হিচাপে অন্তৰ্ভুক্ত কৰাটো তেওঁৰ সপোন বুলি উল্লেখ কৰে।

উল্লেখযোগ্য যে, অসমীয়া চলচ্চিত্ৰ জগতৰ জনপ্ৰিয় অভিনেতা ৰবি শৰ্মাই ২ আগষ্টত বিজেপিৰ ৰাষ্ট্ৰীয় উপ-সভাপতি তথা মধ্যপ্ৰদেশৰ প্ৰাক্তন মুখ্য মন্ত্ৰী শিৱৰাজ সিং চৌহান আৰু অন্যান্য দলীয় শীৰ্ষ নেতাৰ উপস্থিতিত বিজেপিত যোগদান কৰিছিল।