অসমীয়া চলচ্চিত্ৰ জগতৰ জনপ্ৰিয় অভিনেতা ৰবি শৰ্মাই শুকুৰবাৰে বিজেপিৰ ৰাষ্ট্ৰীয় উপ-সভাপতি তথা মধ্যপ্ৰদেশৰ প্ৰাক্তন মুখ্য মন্ত্ৰী শিৱৰাজ সিং চৌহান আৰু অন্যান্য দলীয় শীৰ্ষ নেতাৰ উপস্থিতিত বিজেপিত যোগদান কৰে।
গুৱাহাটী চিকিৎসা মহাবিদ্যালয় প্ৰেক্ষাগৃহত অনুষ্ঠিত হোৱা এখন সভাত বৰি শৰ্মাই গেৰুৱা দলটোত আনুষ্ঠানিকভাৱে যোগদান কৰি প্ৰাথমিক সদস্য পদ গ্ৰহণ কৰে।
হিয়া দিয়া নিয়া, নায়ক, ইমান মৰম কিয় লাগে, বাৰুদ আদিৰ দৰে জনপ্ৰিয় অসমীয়া চলচ্চিত্ৰত অভিনয় কৰা ৰবি শৰ্মাই বিজেপিত যোগদান কৰি ভবিষ্যতে দলটোৰ নীতি-আদৰ্শ আগত ৰাখি কাম কৰি যাব বুলি মন্তব্য কৰে।
২০১৩ চনৰ এ পি এছ চি কেলেংকাৰী উদঙাই দিয়া দন্ত চিকিৎসক ড০ অনুস্মিতা গগৈয়েও বৰি শৰ্মাৰ সৈতে বিজেপিত যোগদান কৰে। সাহসী দন্ত চিকিৎসক গৰাকীয়ে এ পি এছ চি কেলেংকাৰীৰ কথা উদঙাই দি ইয়াৰ বিৰুদ্ধে ডিব্ৰুগড় আৰক্ষী থানাত অভিযোগ ৰুজু কৰিছিল।
অনুস্মিতা গগৈৰ অভিযোগৰ ভিত্তিতে আৰক্ষীয়ে নৱকান্ত পাটিৰ নামৰ অভিযন্তা গৰাকীক গ্ৰেপ্তাৰ কৰিবলৈ সক্ষম হৈছিল আৰু পৰৱৰ্তী সময়ত পাটিৰৰ সৈতে আন বহুকেইগৰাকী লোকক গ্ৰেপ্তাৰ কৰিবলৈ সক্ষম হয়।
উল্লেখযোগ্য যে, বিজেপিৰ ৰাষ্ট্ৰজোৰা সদস্য ভৰ্তি অভিযানৰ অংশস্বৰূপে অসমত বিজেপিৰ ৰাষ্ট্ৰীয় উপ সভাপতি শিৱৰাজ সিং চৌহান উপস্থিত হয়।