পণ্ডিচেৰী আন্ত:ৰাষ্ট্ৰীয় চলচ্চিত্ৰ মহোৎসৱত প্ৰদৰ্শিত হ’ব অসমীয়া চলচ্চিত্ৰ ‘কেলেণ্ডাৰ’

শেহতীয়াকৈ বাণিজ্যিকভাৱে সফল হোৱা কেইখনমান অসমীয়া চলচ্চিত্ৰৰ ভিতৰৰ অন্যতম এখন হিমজ্যোতি তালুকদাৰৰ কেলেণ্ডাৰ এইবাৰ পণ্ডিচেৰী আন্ত:ৰাষ্ট্ৰীয় চলচ্চিত্ৰ মহোৎসৱৰ লগতে বাহিৰৰ কেইটামান চিত্ৰ গৃহত প্ৰদৰ্শনৰ সাজু হৈছে।

কম বাজেটৰ এই ছবিখন যোৱা ১৬ ফেব্ৰুৱাৰিত অসমৰ ২০ টা চিত্ৰ গৃহত মুক্তি দিয়াৰ পিছত সম্পূৰ্ণ চাৰিটা সপ্তাহ একেৰাহে চলাটোৱে সকলোৰে দৃষ্টি আকৰ্ষণ কৰে।

এই ছবিখন ভাৰতৰ বেছিভাগ প্ৰধান মহানগৰ-নতুন দিল্লী, মুম্বাই, হায়দৰাবাদ, নৱী মুম্বাই, চেন্নাই, বাংগালোৰ আৰু বৰোদাত প্ৰদৰ্শনৰ পিছত অসমীয়াৰ লগতে অনা অসমীয়া দৰ্শকেও চিত্ৰগৃহত ভিৰ কৰা পৰিলক্ষিত হৈছিল।

আনহাতে, অসমীয়া চলচ্চিত্ৰৰ বাবে বাট কাটি  গুজৰাটত প্ৰদৰ্শন কৰা প্ৰথম অসমীয়া চলচ্চিত্ৰ হিচাপে পৰিগণিত হৈছে ‘কেলেণ্ডাৰ’।

হিমজ্যোতি তালুকদাৰে কয় যে তেওঁ পণ্ডিচেৰী আন্ত:ৰাষ্ট্ৰীয় চলচ্চিত্ৰ মহোৎসৱ ২০১৮’ত ‘কেলেণ্ডাৰ’ প্ৰদৰ্শনৰ বাবে দাখিল কৰাৰ পিছত তেওঁলোকে ইয়াক নিৰ্বাচিত কৰিছে।

পূৰ্বতে পিকাৰফ্লিক ইণ্ডি চলচ্চিত্ৰ মহোৎসৱ হিচাপে পৰিচিত চলচ্চিত্ৰ মহোৎসৱখনক এই বছৰৰ পৰা পণ্ডিচেৰী আন্ত:ৰাষ্ট্ৰীয় চলচ্চিত্ৰ মহোৎসৱ হিচাপে নামকৰণ কৰা হৈছে। পণ্ডিচেৰী পৰ্যটন বিভাগেও এই মহোৎসৱলৈ সহযোগিতা আগবঢ়াইছে আৰু ইয়াত এশখনতকৈয়ো অধিক চলচ্চিত্ৰ প্ৰদৰ্শন কৰা হ’ব।

‘কেলেণ্ডাৰ’ৰ কেইটামান মুখ্য চৰিত্ৰত অভিনয় কৰিছে অৰুণ নাথ, মলয়া গোস্বামী, গুঞ্জণ ভৰদ্বাজ আৰু ৰিমঝিম ডেকাই। চলচ্চিত্ৰখনে পৰিৱৰ্তিত মূল্যবোধৰ সাৰ্থক চিত্ৰায়নৰ লগতে এটা সুন্দৰ সমাপ্তি দাঙি ধৰিছে।