আকৌ গুজৰাট! পুনৰ ভাঙি পৰিল দলং, নদীত উটি গৈ সন্ধানহীন কমেও ৬জন
মোৰবী দলং দুৰ্যোগৰ এবছৰো পাৰ হোৱা নাই। তাৰ মাজতে গুজৰাটত পুনৰ ভাঙি পৰিল এখন দলং। ৰাষ্ট্ৰীয় ঘাইপথৰ সৈতে সংযোগ ৰক্ষা কৰা দলংখন ভাঙি পৰাৰ ফলত কমেও ১০ জন লোক পানীত উটি যায়। ইয়াৰে ৬জন লোকৰ এতিয়াও সন্ধান পোৱা হোৱা নাই।
সুৰেন্দ্ৰনগৰৰ এই দলংখন ভাঙি নদীত ডুবি যায় কেইবাখনো বাইক-গাড়ী। দেওবাৰৰ এই ঘটনাই ২০২২ চনৰ গুজৰাটত সংঘটিত মোৰবী দুৰ্যোগৰ স্মৃতিৰ সোঁৱৰাই দিছে।
স্থানীয় প্ৰশাসনৰ সূত্ৰ অনুসৰি, ভোগাভো নদীৰ ওপৰত নিৰ্মাণ কৰা দলংখন প্ৰায় ৪০ বছৰ পুৰণি। দেওবাৰে দলংখন এখন ডাম্পাৰ আৰু দুখন বাইক পাৰ হৈ আছিল। সেই সময়তে দলংখন মাজতে ভাঙি পৰে। লগে লগে নদীত উটি যায় কমেও ১০জন লোক। ডাম্পাৰ আৰু বাইকো নদীত পৰি যায়।
লগতে পঢ়ক: গাড়ীৰ হেডলাইটক লৈ কাজিয়াৰ সূত্ৰপাত; আৰক্ষীৰ প্ৰচণ্ড চৰত মৃত্যু ব্যক্তিৰ
খবৰ পোৱাৰ পিছতে স্থানীয় লোকে উদ্ধাৰৰ কাম আৰম্ভ কৰে। তেওঁলোকৰ প্ৰচেষ্টাত ৪ জন লোকক নদীৰ পৰা উদ্ধাৰ কৰা হয়। জানিব পৰা মতে, বৰ্তমান তেওঁলোক চিকিৎসালয়ত চিকিৎসাধীন হৈ আছে। অৱশ্যে এতিয়ালৈকে পানীত ডুব যোৱা আৰু ৬ জন লোকৰ সন্ধান পোৱা হোৱা নাই।
আৰক্ষী আৰু চৰকাৰী বিষয়াৰ নিৰীক্ষণত নদীখনত তালাচী চলোৱা হৈছে। অৱশ্যে স্থানীয় ৰাইজে আশংকা কৰিছে যে ৬ জন লোকক জীৱিত অৱস্থাত উদ্ধাৰ কৰাটো হয়তো সম্ভৱ নহ’ব।
Several feared killed after bridge collapsed in Gujarat's Surendranagar.pic.twitter.com/gshETSYtSq https://t.co/bXR9F6Lcvk
— Arvind Chauhan, very allergic to 'ya ya'. (@Arv_Ind_Chauhan) September 24, 2023
দলংখন ভাঙি পৰাত ক্ষুব্ধ হৈ পৰে স্থানীয় ৰাইজ। দীৰ্ঘদিন ধৰি দলংখন পুনৰ নিৰ্মাণৰ দাবীক প্ৰশাসনে গুৰুত্ব নিদিয়াৰ অভিযোগ উত্থাপন কৰে।
অৱশ্যে সেই দলংখনত গধুৰ যান-বাহনৰ চলাচল নিষিদ্ধ বুলি জানিবলৈ দিয়ে জিলা উপায়ুক্ত কে চি সম্পথে। দলংখন মেৰামতিৰ বাবে প্ৰশাসনৰ অনুমতি লাভ কৰা বুলি উল্লেখ কৰি তেওঁ অতি সোনকালে কাম আৰম্ভ হ’ব বুলি কয়।