বাক্সা জিলাৰ নাগ্ৰীজুলি চাহ বাগিচাত চিকিৎসক দেবেন দত্তৰ মৃত্যুত শোকসভা আৰু সজাগতা সভা
বাক্সা জিলাৰ তামুলপুৰ মহকুমাৰ নাগ্ৰীজুলি চাহ বাগিচাত টীয়ক চাহ বাগিচাত একাংশ উন্মত্ত লোকৰ প্ৰহাৰত মৃত্যু বৰণ কৰা চিকিৎসক ডাঃ দেবেন দত্তৰ প্ৰতি শ্ৰদ্ধা জনাই আজি এখন শোক সভা আৰু সজাগত সভা অনুষ্ঠিত কৰা হয়।
নাগ্ৰীজুলি চাহ বাগিচা কাৰ্য্যালয় চৌহদত অনুষ্ঠিত হোৱা সজাগতা সভা খনত নাগ্ৰীজুলি চাহ বাগিচাৰ জেষ্ঠ পৰিচালক প্ৰদীপ কুমাৰ তিৱাৰী, সহকাৰী পৰিচালক প্ৰবীণ শইকীয়া, চাহ বাগিচা পৰিচালক মণ্ডলী, চাহ বাগিচা কাৰ্য্যালয়ৰ কৰ্মচাৰী বৃন্দ, নাগ্ৰীজুলি চাহ বাগিচা চাহ মজদূৰ সংঘৰ সভাপতি জীৱন তীর্কী আৰু বিষয়-ববীয়াৰ লগতে চাহ বাগিচাখনৰ শ্ৰমিক সকল উপস্থিত থাকে।
শোকসভাত উপস্থিত লোকসকলে টীয়কত প্ৰাণ হেৰুওৱা চিকিৎসকগৰাকীৰ বিদেহী আত্মাৰ সদগতিৰ বাবে এক মিনিট সময় মৌন প্ৰাৰ্থনা কৰে।
আনহাতে, শোকসভাৰ অন্তত অনুষ্ঠিত হোৱা সজাগতা সভাত টীয়ক চাহ বাগিচাত সংঘটিত দুৰ্ভাগ্যজনক ঘটনাৰ বিষয়ে বিতংকৈ আলোচনা কৰা হয় আৰু ইয়াৰ দুৰ্ভাগ্যজনক আখ্যা দিয়া হয়।
তদুপৰি, চিকিৎসকক প্ৰহাৰৰ দৰে দুৰ্ভাগ্যজনক ঘটনা যাতে জিলাখনৰ চাহ বাগিচাত কেতিয়াও সংঘটিত হ’ব নোৱাৰে তাৰ বাবে সকলোকে সজাগ হ’বলৈ সভাৰ মাধ্যমেৰে আহ্বান জনোৱা হয়।
চাহ বাগিচা অঞ্চলসমূহত শিক্ষা-দীক্ষাৰ প্ৰচাৰ আৰু প্ৰসাৰৰ বাবেও বিশেষ উদ্যোগ গ্ৰহণ কৰাৰ ক্ষেত্ৰত সজাগত সভাখনত আলোচনা কৰা হয়।