India Vs West Indies: অক্ষৰ পেটেলৰ দুৰ্দান্ত বেটিঙেৰে দ্বিতীয় এদিনীয়াত শ্বাসৰুদ্ধকৰ জয়; শৃংখলা ভাৰতৰ দখলত

India Vs West Indies অক্ষৰ পেটেলে ৱেষ্ট ইণ্ডিজৰ পৰা একপ্ৰকাৰ বিজয় কাঢ়ি আনে। বাওঁহতীয়া অলৰাউণ্ডাৰগৰাকীৰ দুৰ্দান্ত প্ৰদৰ্শনৰ বাবেই অন্তিমখন খেল বাকী থকা অৱস্থাত ভাৰতে এদিনীয়া শৃংখলাটো নিজৰ দখলত আনে। অন্তিম অভাৰটোত খেলখনৰ বিজয় নিশ্চিত হয়।

ৱেষ্ট ইণ্ডিজৰ ৩১২ ৰাণৰ লক্ষ্য অনুসৰণ কৰি শ্ৰেয়াস আয়াৰ আৰু সঞ্জু ছেমছনে অৰ্ধশতক অৰ্জন কৰে। কিন্তু শেষৰ পিনে অক্ষৰৰ ৩৫ টা বলত অপৰাজিত ৬৪ ৰাণে দলটোক বিজয়ী কৰে।

দেওবাৰে বেটিং কৰিবলৈ নামি ৱেষ্ট ইণ্ডিজৰ দুয়োজন অপেনাৰে আৰম্ভণিৰে পৰা আক্ৰমণাত্মক বেটিং আৰম্ভ কৰে। কাইল মেয়াৰ্ছে হোপৰ সৈতে পাৱাৰ প্লেত দ্ৰুতগতিত স্ক’ৰ কৰে। তেওঁলোকে ভাৰতৰ হৈ প্ৰথমখন এদিনীয়া খেলত নমা  আৱেশ খানক লক্ষ্য কৰি লয়। সোঁহাতীয়া পেচাৰগৰাকীৰ বাবে এইটো মুঠেই ভাল আৰম্ভণি নহ’ল। তেওঁ প্ৰথম তিনি অভাৰত ৪০ ৰাণ দিয়ে।

স্পিনাৰসকলে ভাৰতক খেলখনলৈ ঘূৰাই আনে। দীপক হুডাই মেয়াৰ্ছক তেওঁৰ প্ৰথম বলত ৩৯ ৰাণত আউট কৰে। তিনি নম্বৰত অহা শ্বামৰা ব্ৰুকছে হোপৰ সৈতে যুটী বান্ধে। অক্ষৰ পেটেলে তেওঁক ৩৫ ৰাণত আউট কৰে। যুজবেন্দ্ৰ চাহালৰ বলত ব্ৰেণ্ডন কিং শূন্য ৰাণতে ড্ৰেছিং ৰুমলৈ উভতি যায়।

.@akshar2026 played a sensational knock & bagged the Player of the Match award as #TeamIndia beat West Indies in the 2nd ODI to take an unassailable lead in the series. 👏 👏 #WIvIND

Scorecard▶️ https://t.co/EbX5JUciYM pic.twitter.com/4U9Ugah7vL

— BCCI (@BCCI) July 24, 2022

অধিনায়ক পুৰাণে তিনিটা উইকেটৰ পতনৰ পিছত হোপৰ সৈতে যুটি বান্ধে। তেওঁলোকে অভিজ্ঞতাৰ  ব্যৱহাৰ কৰি ৰাণ কৰিবলৈ লয়। প্ৰায় প্ৰতিটো অভাৰত এটা বাউণ্ডেৰী আহি থাকে। ফলত ৰাণৰ গতি হ্ৰাস হোৱা নাছিল। পুৰাণে ইনিংছ অলপ সুস্থিৰ হোৱাৰ পিছতে ডাঙৰ শ্বট খেলিবলৈ আৰম্ভ কৰে। তেওঁ বিশেষকৈ স্পিনাৰসকলক লক্ষ্য কৰি লয়। তেওঁ শতক অৰ্জন কৰিব বুলি ভাৱ হৈছিল যদিও ৭৪ ৰাণত উইকেট এৰি খেলিবলৈ লওঁতেই শাৰ্দুল ঠাকুৰে পুৰণক বোল্ড কৰি দিয়ে।

অধিনায়কগৰাকীয়ে কৰিব নোৱাৰিলে যদিও হোপে এটা শতক অৰ্জন কৰে। সোঁহতীয়া বেটাৰগৰাকীয়ে চাহালৰ বলত এটা ছয় মাৰি এদিনীয়া ক্ৰিকেটত ১৩ তম শতক অৰ্জন কৰে। অৱশেষত ১১৫ ৰাণ সংগ্ৰহ কৰাৰ পিছত শাৰ্দুলে তেওঁক আউট কৰে। শাৰ্দুল ভাৰতৰ বাবে আটাইতকৈ সফল বলাৰ হিচাপে বিবেচিত হয়। তেওঁ ৫৪ ৰাণত ৩ টা উইকেট দখল কৰে।

ইয়াৰ প্ৰত্যুত্তৰত বেটিং কৰিবলৈ নামি শিখৰ ধাৱানে মন্থৰভাৱে বেটিং আৰম্ভ কৰে। আনগৰাকী অপেনাৰ শুভমান গীল ছন্দত আছিল যদিও ৰাণ সংগ্ৰহৰ গতি বেছি নাছিল। বৰষুণৰ বাবে খেলখন কিছু সময়ৰ বাবে বন্ধ কৰি দিয়া হয়। খেলখন পুনৰ আৰম্ভ হয় যদিও ধাৱনৰ খেলত ছন্দ ঘূৰি নাহিল। মাত্ৰ ১৩ ৰাণ সংগ্ৰহ কৰাৰ পিছত তেওঁ আউট হৈ যায়।

শুভমনে ভাল খেলিছিল যদিও বেছি ৰাণ সংগ্ৰহ কৰিব নোৱাৰিলে। তেওঁ ৪৩ ৰাণ সংগ্ৰহ কৰি ড্ৰেছিং ৰুমলৈ উভতি যায়। সূৰ্যকুমাৰ যাদৱেও বেটত ৰাণ নাপালে। শ্ৰেয়াস আয়াৰ আৰু সঞ্জু ছেমছনে তিনিটা উইকেটৰ পতনৰ পিছত যুটী বান্ধি  দুয়োৱে দলটোক আগুৱাই নিয়ে। দুয়োগৰাকী বেটছমেনে অৰ্ধ-শতক অৰ্জন কৰে। তেওঁলোকেই ভাৰতক বিজয়ৰ ওচৰলৈ লৈ যাব যেন লাগিছিল। কিন্তু শ্ৰেয়াস ৬৩ ৰাণ সংগ্ৰহ কৰি আউট হয়। সঞ্জুৱে ৫৪ ৰাণ সংগ্ৰহ কৰে। পাঁচটা উইকেট হেৰুৱাই ভাৰত কিছু চাপত পৰে।

ভাৰতক শেষৰ ১০ অভাৰত জিকিবলৈ ১০০ ৰাণৰ প্ৰয়োজন হয়। উইকেটত তেতিয়া দীপক হুডা আৰু অক্ষৰ পেটেল। ভাৰতে প্ৰতি অভাৰত ১০ ৰাণ সংগ্ৰহ কৰিব লগা পৰিস্থিতিৰ সৃষ্টি হয়। এই পৰিস্থিতিত অক্ষৰে হাত খুলিবলৈ আৰম্ভ কৰে। দীপক হুডাই বাওঁহতীয়া বেটাৰগৰাকীক সংগ দিয়ে। তেওঁ ৩৩ ৰাণত আউট হয় যদিও অক্ষৰ উইকেটত থাকে। তেওঁ আলজাৰি জোচেফৰ এটা অভাৰতে খেলখনৰ ৰূপ সলনি কৰি দিয়ে। ৱেষ্ট ইণ্ডিজৰ কোনো বলাৰে তেওঁক আৰু ৰখাব নোৱাৰিলে।

অক্ষৰে মাত্ৰ ২৭ টা বলত এদিনীয়া ক্ৰিকেটত প্ৰথমটো অৰ্ধশতক অৰ্জন কৰে। ভাৰতক শেষ অভাৰত জিকিবলৈ ৮ ৰাণৰ প্ৰয়োজন হয়। হাতত মাত্ৰ ২ টা উইকেট। প্ৰথম বলটোত কোনো ৰাণ নহ’ল। অক্ষৰে পৰৱৰ্তী বলটোত ১ ৰাণ লয়। তৃতীয় বলটোত এটা ৰাণ লয় মহম্মদ চিৰাজে। অক্ষৰে চতুৰ্থ বলটোত এটা ছয় মাৰি দলক বিজয়ী কৰে। তেওঁ মাত্ৰ ৩৫ টা বলত ৬৪ ৰাণ কৰি অপৰাজিত থাকে।