মুক্ত জিতেন-মৃণাল, জামিন আদালতৰ
সতীৰ্থ-সমৰ্থকৰ ‘জিন্দাবাদ’ ধ্বনিৰ মাজত বৃহস্পতিবাৰে মুকলি আকাশৰ তললৈ ওলোৱাৰ পথ প্ৰশস্ত হ’ল আলফা নেতা মৃণাল হাজৰিকা আৰু জিতেন দত্তৰ।
দুয়োগৰাকী আলফা নেতাকে জামিন প্ৰদান কৰিলে কামৰূপ মহানগৰৰ ন্যায়িক দণ্ডাধীশৰ আদালতে। ২০ হাজাৰকৈ টকাৰ বণ্ডত দুয়োকে আদালতে জামিন দিছে।
১৪ দিনীয়া কাৰাবন্দিত্বৰ অৱসান ঘটাই শুকুৰবাৰে কাৰাগাৰৰ পৰা মুকলি হ’ব মৃণাল হাজৰিকা আৰু জিতেন দত্ত। আৰক্ষীয়ে আদালতত দুয়োৰে বিৰুদ্ধে কে’ছ ডায়েৰি দাখিল কৰা বুলি নৰ্থ ইষ্ট নাও-ক জনাইছে আলফা নেতা দুজনৰ অধিবক্তা বিজন মহাজনে।
নাগৰিকত্ব বিধেয়কৰ বিৰুদ্ধে সোচ্চাৰ হৈ অহা দুয়োগৰাকী আলফা নেতাৰ মুক্তিৰ দাবীত ৰাজ্যৰ বিভিন্ন প্ৰান্তত ব্যাপক প্ৰতিবাদ হোৱাৰ লগতে চৰকাৰৰ ভূমিকাক লৈয়ো বিভিন্ন মহলে প্ৰশ্ন উত্থাপন কৰিছিল।
‘প্ৰৰোচনামূলক’ মন্তব্য কৰাৰ অভিযোগত গুৱাহাটীৰ গীতানগৰ আৰক্ষী থানাত ৰুজু হোৱা এক গোচৰ নং ৪৪৮/২০১৮ আৰু ৪৪৩/২০১৮ৰ ভিত্তিত ক্ৰমে দত্ত আৰু হাজৰিকাক আৰক্ষীয়ে গ্ৰেপ্তাৰ কৰিছিল।