এখন বিদ্যালয়ে লিংগ সমতাৰ বাবে ল’লে বিশেষ পদক্ষেপ, প্ৰৱৰ্তন লিংগ নিৰপেক্ষ ইউনিফৰ্ম

লিংগ সমতা নিশ্চিত কৰিবলৈ কেৰালাৰ কোজিকোডৰ এখন চৰকাৰী উচ্চতৰ মাধ্যমিক বিদ্যালয়ে হাতত লৈছে এক বিশেষ পদক্ষেপ। বুধবাৰে বিদ্যালয় খনৰ একাদশ শ্ৰেণীৰ শিক্ষাৰ্থীসকলৰ বাবে লিংগ-নিৰপেক্ষ ইউনিফৰ্ম গ্ৰহণ কৰি এক আদৰ্শ দেখুৱাইছে।

বিদ্যালয় খনৰ একাদশ শ্ৰেণীৰ প্ৰায় ২০০ গৰাকী ছাত্ৰী আৰু ৬০ জন ছাত্ৰৰ বাবে নীলা পেণ্ট আৰু পটিযুক্ত বগা চাৰ্টৰ এক উমৈহতীয়া ইউনিফৰ্ম নিৰ্ধাৰণ কৰিছে।

বিদ্যালয়ৰ পৰিচালনা সমিতিৰ সভাপতি কে শিবুৱে কয় যে বিদ্যালয়খনে কোনো শিক্ষাৰ্থীক নতুন ইউনিফৰ্ম পিন্ধিবলৈ বাধ্য নকৰে। ছোৱালী আৰু ল’ৰা দুয়োৰে বাবে একে স্তৰৰ স্বাধীনতা নিশ্চিত কৰাৰ বাবে এই ইউনিফৰ্ম প্ৰৱৰ্তন কৰা হৈছে। শিক্ষাৰ্থীসকলে স্ব ইচ্ছাৰেওৰণি বা স্কার্ফ ব্যৱহাৰ কৰিব পাৰিব বুলি তেওঁ মন্তব্য কৰে।

প্ৰথমবাৰৰ বাবে চৰকাৰী খণ্ডৰ এখন উচ্চতৰ মাধ্যমিক বিদ্যালয়ে ছোৱালী আৰু ল’ৰাৰ বাবে এক উমৈহতীয়া ইউনিফৰ্ম ৰূপায়ণ কৰিছে। লিংগ সমতাৰ বাবে ই এক আকৰ্ষণীয় পদক্ষেপ হিচাপে চৰ্চিত হৈছে।

লিংগ-নিৰপেক্ষ ইউনিফৰ্ম ৰূপায়ণৰ কথা ঘোষণা কৰি উচ্চ শিক্ষা মন্ত্ৰী অধ্যাপক আৰ বিন্দুৱে কয় যে নতুন ইউনিফৰ্মে লিংগ নিৰ্বিশেষে শিক্ষাৰ্থীসকলৰ আত্মবিশ্বাস বৃদ্ধি কৰিব। আনহাতে নতুন ইউনিফৰ্মৰ বিৰুদ্ধে একাংশ গোঢ়া মুছলমান লোকৰ বিৰোধিতা সন্দৰ্ভত মন্ত্ৰী গৰাকীয়ে কয় যে সমাজত প্ৰগতিশীল পৰিৱৰ্তনৰ বিৰুদ্ধে ৰক্ষণশীল উপাদানবোৰে বিদ্ৰোহ কৰাটো অতি স্বাভাৱিক।

তেওঁ লগতে কয় যে লিংগ-নিৰপেক্ষ ইউনিফৰ্মে পুৰুষ আৰু মহিলাৰ মাজৰ পৃথকীকৰণ বিলুপ্ত কৰাত সহায় কৰিব আৰু এক বাৰ্তা দিব যে সকলো মানুহে একে দিশত আগবাঢ়িব লাগে। যেতিয়া ল’ৰাবোৰে তেওঁলোকৰ পোছাক বাছনি কৰাৰ স্বাধীনতা পায়, ছোৱালীবোৰে আনক আকৰ্ষিত কৰিবলৈ পোছাক পিন্ধিব লাগে। এয়া এক প্ৰকাৰৰ বৈষম্য বুলি গুৰুত্বপূৰ্ণ মন্তব্য কৰে মন্ত্ৰী গৰাকীয়ে।

নতুন ইউনিফৰ্মে ছোৱালীবোৰক তেওঁলোকৰ শৰীৰৰ বিষয়ে চিন্তা নকৰাকৈ আত্মবিশ্বাসেৰে ঘূৰি ফুৰাত সহায় কৰিব বুলি উল্লেখ কৰি মন্ত্ৰী গৰাকীয়ে লিংগ-নিৰপেক্ষ ইউনিফৰ্ম বৃহৎ পৰিৱৰ্তনৰ দিশত এক পদক্ষেপ বুলি চিহ্নিত কৰে।