২২ জানুৱাৰিৰ পৰা বাংলাদেশত আৰম্ভ হ’ব ই-পাছপোৰ্ট সেৱা
অহা ২২ জানুৱাৰিৰ পৰা বাংলাদেশে ই-পাছপোৰ্ট সেৱা মুকলি কৰাৰ বাবে প্ৰস্তুতি সম্পূৰ্ণ কৰিছে।
জানিব পৰা মতে, বাংলাদেশৰ প্ৰধান মন্ত্ৰী শ্বেইখ হাচিনাই ২২ জানুৱাৰিত আনুষ্ঠানিকভাৱে বংগবন্ধু আন্তঃৰাষ্ট্ৰীয় সন্মিলনত ই-পাছপোৰ্ট বিতৰণ সেৱা আৰম্ভ কৰিব।
বাংলাদেশৰ ইমিগ্ৰেশ্যন আৰু পাছপোৰ্ট বিভাগে প্ৰথমিকভাৱে আগাৰগাঁও, জাতৰাবাৰী আৰু উত্তৰা পাছপোৰ্ট কাৰ্য্যালয়ত ই-পাছপোৰ্ট বিতৰণ আৰম্ভ কৰিব আৰু পৰ্যায়ক্ৰমে এই সেৱা সমগ্ৰ দেশত আৰম্ভ কৰিব।
৪,৫৬৯ কোটি বাংলাদেশী টাকা ব্যয় সাপেক্ষে বাংলাদেশ চৰকাৰে ই-পাছপোৰ্ট সেৱা দেশখনত আৰম্ভ কৰাৰ বাবে পৰিকল্পনা গ্ৰহণ কৰিছিল।
ভেৰিদোজ জিএমবিএইচ নামৰ এটা জাৰ্মান প্ৰতিষ্ঠানে ই-পাছপোৰ্ট নিৰ্মাণৰ কামৰ দায়িত্বত জৰিত হৈ আছে।
বাংলাদেশৰ ইমিগ্ৰেশ্যন আৰু পাছপোৰ্ট বিভাগে ২০১৮ চনৰ ১৯ জুলাইত ভেৰিদোজ জিএমবিএইচৰ সৈতে ইলেক্ট্ৰ’নিক পাছপোৰ্ট নিৰ্মাণৰ চুক্তি স্বাক্ষৰ কৰিছিল।
২০২৮ চনলৈ চৰকাৰী ধনেৰে সমগ্ৰ ই-পাছপোৰ্ট প্ৰকল্প কাৰ্য্যকৰী কৰা হ’ব।
দহ বছৰৰ ভিতৰত প্ৰায় ৩০ মিলিয়ন লোকক ই-পাছপোৰ্ট প্ৰদান কৰাৰ লক্ষ্য নিৰ্ধাৰণ কৰি লোৱা হৈছে। এই পাছপোৰ্ট সমূহৰ পাঁচ বছৰৰ পৰা দহ বছৰলৈ ভেলিডিটি নিৰ্ধাৰণ কৰা হৈছে।