১৯ অনুৰ্দ্ধৰ বিশ্বকাপ ক্ৰিকেটৰ মুকুট বাংলাদেশৰ শিৰত; স্তব্ধ ভাৰতৰ বিজয় ৰথ

একেৰাহে বিজয়ৰ অপ্ৰতিৰোধ্য গতি অব্যাহত ৰখাৰ পাছত দক্ষিণ আফ্ৰিকাত চলি থকা ১৯ অনুৰ্দ্ধৰ বিশ্বকাপ ফাইনেলত ভাৰতৰ গতি অৱশেষত স্তব্ধ হ’ল।

বলাৰসকলৰ সুন্দৰ প্ৰদৰ্শনৰ পাছত আকবৰ আলীৰ অধিনায়কোচিত বেটিঙৰ সহায়ত বাংলাদেশে আইচিচি ক্ৰিকেট ১৯ অনুৰ্দ্ধৰ বিশ্বকাপ ফাইনেলত ভাৰতক ৩ উইকেটত পৰাজিত কৰি প্ৰথমবাৰৰ বাবে এই খিতাপ অৰ্জন কৰে।

ভাৰতে প্ৰথমে বেটিং কৰি বাংলাদেশৰ সন্মুখত ১৭৮ ৰাণৰ লক্ষ্য বান্ধি দিয়ে।

এই লক্ষ্য অনুসৰণ কৰি বাংলাদেশে ৪১ অভাৰত ৭ উইকেটৰ বিনিময়ত ১৬৩ ৰাণ কৰাৰ পাছত বৰষুণৰ বাবে খেল বন্ধ হৈ পৰে।

দ্বিতীয়বাৰৰ বাবে খেল আৰম্ভ হোৱাত বাংলাদেশক ৪৬ অভাৰত ১৭০ ৰাণৰ লক্ষ্য বান্ধি দিয়া হয় যিটো তেওঁলোকে ৪২.১ অভাৰত সাত উইকেটৰ বিনিময়ত সংগ্ৰহ কৰে।

বাংলাদেশৰ অধিনায়ক আকবৰে ৭৭টা বলত ৪টা চাৰি আৰু এটা ছয়েৰে অপৰাজিত ৪৩ ৰাণৰ ইনিংছ খেলে।

নিম্ন স্কোৰৰ মেচখনত বাৰতে নিজৰ দিশাহীন বলিঙৰ ফলো ভোগ কৰিবলগীয়া হয়। টীম ইণ্ডিয়াই ৩৩ ৰাণ অতিৰিক্ত হিচাপে দিয়ে যাৰ বাবে বাংলাদেশৰ বিজয় লক্ষ্য অধিক উজু হৈ পৰে।

চাৰিবাৰৰ বিজয়ী টীম ইণ্ডিয়াৰ হৈ লেগ স্পীনাৰ ৰবি বিষ্ণইয়ে ৩০ ৰাণৰ বিনিময়ত ৪টা উইকেট লয় যদিও নিজৰ দলক বিজয়ী কৰিব নোৱাৰিলে। সুশান্ত মিশ্ৰইয়ো ২৫ ৰাম দি দুটা উইকেট লাভ কৰে।

আনহাতে, ভাৰতীয় বেট্ছমেন যশস্বী জয়ছোৱালে ১২১ টা বলত ৮৮ ৰাণৰ ইনিংছ খেলে। কিন্তু বাকী বেট্ছমেনৰ ব্যৰ্থতাৰ বাবে সেয়া বিজয়ৰ পথত গুৰুত্বহীন হৈ পৰিল।