ডি ভোটাৰৰ গোচৰ প্ৰত্যাহাৰৰ দাবী : তামুলপুৰত বঙালী যুৱ ছাত্ৰ ফেডাৰেচনৰ প্ৰতিবাদ

বডোলেণ্ড টেৰিটৰিয়েল ৰিজিঅ’নৰ নিৰ্বাচন চমু চাপি অহাৰ লগে লগে মঙলবাৰে তামুলপুৰৰ গুৱাবাৰীত সদৌ অসম বঙালী যুৱ ছাত্ৰ ফেডাৰেচনে তীব্ৰ প্ৰতিবাদ সাব্যস্ত কৰে।

ফেডাৰেচনৰ নাগ্ৰীজুলি আঞ্চলিক শাখাই আয়োজন কৰা এই বিক্ষোভত অসমৰ হিন্দু বাঙালীৰ বিৰুদ্ধে দাখিল কৰা “ডি ভোটাৰ” গোচৰ প্ৰত্যাহাৰ কৰিবলৈ দাবী জনায়।

২২ জুলাইত ৰাজ্য চৰকাৰে জাৰি কৰা অধিসূচনাৰ বিৰোধিতা কৰি ছাত্ৰ সংগঠনটোৱে শীঘ্ৰে শুধৰণি কৰিবলৈ আহ্বান জনাইছে।

“বঙালীৰ বিৰুদ্ধে ডি ভোটাৰৰ গোচৰ প্ৰত্যাহাৰ কৰক”, “হিমন্ত বিশ্ব শৰ্মা সাৱধান”, “বঙালী ফেডাৰেচন জিন্দাবাদ”, “বিজেপি চৰকাৰৰ গ’ বেক”, “দীপক দে জিন্দাবাদ”, “দিলীপ শইকীয়া সাৱধান” আদি শ্লোগান উত্থাপন কৰি প্ৰতিবাদকাৰীসকলে স্থানত এক উত্তেজক পৰিৱেশৰ সৃষ্টি কৰে।প্ৰতিবাদস্থলীৰ পৰা ফেডাৰেচনে হিন্দু বঙালীৰ বিৰুদ্ধে “ডি ভোটাৰ” গোচৰ তৎকালীনভাৱে বাতিল কৰিবলৈ চৰকাৰক আহ্বান জনায়। তেওঁলোকে আৰু সকীয়াই দিয়ে যে এনে নকৰিলে আগন্তুক দিনত আৰু অধিক তীব্ৰ আৰু আগ্ৰাসী আন্দোলনৰ সূচনা হ’ব।