বাপৰে বাপ! মোডী-যোগীৰ আধাৰৰ তথ্য সলনি যুৱকৰ; গ্ৰেপ্তাৰ অভিযুক্ত

সাধাৰণ লোকৰ নহয়, প্ৰধানমন্ত্ৰী নৰেন্দ্ৰ মোডীৰ আধাৰৰ তথ্য সলনি! একেদৰে উত্তৰ প্ৰদেশৰ মুখ্যমন্ত্ৰী যোগী আদিত্যনাথৰ আধাৰ কাৰ্ডৰ তথ্যও সলনি কৰা হৈছে। এই অভিযোগত গুজৰাট আৰক্ষীয়ে গ্ৰেপ্তাৰ কৰিছে এজন যুৱকক।

বাতৰি অনুসৰি, ধৃত যুৱকজনৰ নাম অৰ্পন ডুবে ওৰফে মদন কুমাৰ। তেওঁ বিহাৰৰ মুজাফ্ফৰপুৰ জিলাৰ এজন বাসিন্দা। মুজাফ্ফৰপুৰ আৰক্ষী বিষয়া ৰাকেশ কুমাৰে জনোৱা মতে, সাদাতপুৰ অঞ্চলৰ পৰা গুজৰাট আৰক্ষীৰ এটা দলে অৰ্পন ডুবেক গ্ৰেপ্তাৰ কৰে।

জানিব পৰা মতে, অভিযুক্ত যুৱকে কান্তি থানাৰ সাদাতপুৰ অঞ্চলৰ এখন কলেজত  স্নাতক পৰ্যায়ত অধ্যয়নৰ বাবে নামভৰ্তি কৰিছিল। অভিযোগ অনুসৰি তেওঁ ৱেবছাইটত গৈ প্ৰধানমন্ত্ৰী নৰেন্দ্ৰ মোডী আৰু উত্তৰ প্ৰদেশৰ মুখ্যমন্ত্ৰী যোগী আদিত্যনাথৰ আধাৰ কাৰ্ডৰ তথ্য সলনি কৰে।

যুৱকজনে মোডী-যোগীৰ আধাৰ কাৰ্ডত জন্ম তাৰিখ সলনি কৰিছিল বুলি অভিযোগ উঠিছে। কেৱল সেয়াই নহয়, সেই আধাৰ কাৰ্ডসমূহৰ ‘অপব্যৱহাৰ’ হোৱা বুলিও আৰক্ষীৰ সূত্ৰই প্ৰকাশ কৰিছে। অৱশ্যে কেনেধৰণৰ অপব্যৱহাৰ হৈছে সেয়া স্পষ্ট কৰা নাই।

প্ৰধানমন্ত্ৰী আৰু উত্তৰ প্ৰদেশৰ মুখ্যমন্ত্ৰীৰ আধাৰ কাৰ্ডৰ তথ্য সলনি কৰাৰ অভিযোগ পোৱাৰ পিছত গুজৰাট আৰক্ষীয়ে তদন্ত আৰম্ভ কৰে। ইয়াৰ পিছতে ৱেবছাইটৰ ‘আই পি ঠিকনা’ৰ ভিত্তিত আৰক্ষী বিষয়াসকলে অভিযুক্তৰ অৱস্থান লাভ কৰে। তাৰ পিছতে অভিযুক্তক বিহাৰৰ পৰা গ্ৰেপ্তাৰ হয়।