বিহাৰবাসীলৈ প্ৰধান মন্ত্ৰী মোদীৰ আহ্বান : সাৱধানতাৰে কৰক ভোটদান
বিহাৰ বিধানসভাৰ প্রথম পর্যায়ৰ নির্বাচনৰ ভোটগ্রহণ আজি ৰাতিপুৱা ৭ বজাৰ পৰা আৰম্ভ হৈছে।
প্রথম পর্যায়ত ৰাজ্যখনৰ ১৬খন জিলাৰ ৭১টা বিধানসভা সমষ্টিৰ বাবে ভোটগ্ৰহণ চলি আছে। ভোটগ্ৰহণ প্ৰক্ৰিয়া সন্ধিয়া ৬ বজালৈ চলিব।
মহামাৰী ক’ৰ’নাৰ প্ৰতি লক্ষ্য ৰাখি নিৰ্বাচন নিৰাপদে অনুষ্ঠিত কৰিবৰ বাবে নিৰ্বাচন আয়োগে কেতবোৰ নীতি-নিৰ্দেশনা জাৰি কৰিছে।
প্ৰধান মন্ত্ৰী নৰেন্দ্ৰ মোদীয়েও এই নীতি-নিৰ্দেশনা সমূহ মানি চলি ভোটাৰ সকলক ভোটদান কৰিবলৈ আহ্বান জনায়।
মোদীয়ে টুইটটোত লিখে, ‘বিহাৰ বিধানসভা নিৰ্বাচনৰ আজি প্ৰথম পৰ্যায়ৰ ভোটদান। মোৰ অনুৰোধ ভোটৰ সকলে যাতে ক’ভিড সম্বন্ধীয় সকলো সাৱধানতা অৱলম্বন কৰে, সকলোৱে নিজৰ অংশীদাৰী সুনিশ্চিত কৰক’।
তেওঁ লগতে মাস্ক, সামাজিক দূৰত্ব আদি মানি চলিবলৈও আহ্বান জনায়।
উল্লেখ্য যে ক’ৰ’না ভাইৰাছৰ মাজতেই দেশত প্ৰথমবাৰৰ বাবে নিৰ্বাচন অনুষ্ঠিত হৈছে।
প্রথম পর্যায়ত ৭১টা বিধানসভা সমষ্টিৰ দুই কোটিৰো অধিক ভোটাৰে নির্ণয় কৰিব ১,০৬৬ গৰাকী প্রার্থীৰ ভাগ্য৷