বিশ্ব ক্ৰীড়াত আকৌ অসম সন্তানৰ চমক : বিশ্ব ৰেংকিং আৰ্চাৰিত অসমৰ বিশাল চাংমাইৰ স্বৰ্ণ
বাংলাদেশৰ ৰাজধানী ঢাকাত ২২ ফেব্ৰুৱাৰি পৰা চলি থকা বিশ্ব ৰেংকিং আর্চাৰি প্রতিযোগিতাত স্বৰ্ণ পদক অৰ্জনৰ কৃতিত্ব লাভ কৰিলে অসম সন্তান বিশাল চাংমায়ে।
আজি অনুষ্ঠিত দলীয় শাখা ৰিকাৰ্ভত ভাৰতীয় দলটোৱে শীৰ্ষস্থান দখল কৰে, য’ত অসমৰ বিশাল চাংমায়ো এজন সদস্য। প্ৰতিযোগিতাখনত এইটো বিশালৰ দ্বিতীয় পদক।
বাংলাদেশক পিছ পেলাই স্বৰ্ণ পদক অৰ্জন কৰা ভাৰতীয় দলটোক বোকাখাতৰ বিশাল চাংমাইৰ লগতে হাৰিয়ানাৰ পৰশ হুদা আৰু ৰাজস্থানৰ কৰ্ণি সিং চৌহানে প্ৰতিনিধিত্ব কৰিছিল৷ দলীয় শাখাত স্বৰ্ণ জয়ৰ পূৰ্বে বিশাল চাংমাই প্ৰতিযোগিতাখনৰ আন্তঃৰাষ্ট্ৰীয় অলিম্পিক ৰাউণ্ডত ব্ৰঞ্জৰ পদক দখল কৰিছিল।
ভাৰতীয় আৰ্চাৰি দলটোৰ লগতে প্ৰতিযোগিতাখনত বিশাল চাংমাইৰ সফলতাত এতিয়া বোকাখাত অঞ্চলত আনন্দ-উলাহৰ সৃষ্টি হৈছে। বিশালক এই কৃতিত্বৰ বাবে শুভেচ্ছা জনাইছে স্থানীয় লোকসকলে।
বোকাখাতৰ মিলনপুৰৰ নিৱাসী বিশাল চাংমাই শান্তনু চাংমাই আৰু মমী চাংমাইৰ সন্তান। ভাৰতীয় আৰ্চাৰি দলত স্থান পোৱা বিশাল বৰ্তমান আৰ্মি স্প’ৰ্টছ ইনিষ্টিটিউট পুনেৰ প্ৰশিক্ষণ লৈ আছে।