সীমিত লোকৰ উপস্থিতিত পুৰণিগুদাম আৰু চামগুৰিত অনুষ্টুপিয়াকৈ অনুষ্ঠিত হ’ব বিশ্বকৰ্মা পূজা

ৰাজ্যত সমাগত উৎসৱৰ বতৰ। কালিলৈ বিশ্ব খনিকৰ বিশ্বকৰ্মাৰ পূজা। সমগ্ৰ ৰাজ্যতে ভক্তপ্ৰাণ ৰাইজে অতি উলহ-মালহৰ মাজেৰে পূজা ভাগ উদযাপন কৰিব বুলি ক’লে ভুল কোৱা হ’ব।

কাৰণ এইবাৰ ক’ৰ’না মহামাৰী সংক্ৰমণৰ ভয়াবহতাৰ প্ৰতি লক্ষ্য ৰাখি চৰকাৰী নীতি-নিৰ্দেশনা মানি ৰাইজে বৃহস্পতিবাৰে অনুষ্টুপীয়াকৈ পালন কৰিব বিশ্বকৰ্মাৰ পূজা ভাগ।

যাৰ বাবে এতিয়া বিশ্ব খনিকৰ মূৰ্তিত অন্তিম পৰশ দিয়াত ব্যস্ত হৈ পৰিছে বিভিন্ন জন মৃৎ-শিল্পীয়ে। নগাঁও জিলাৰ চামগুৰিৰ গটঙাত থকা পুৰণি মূৰ্তিকাৰৰ প্ৰতিষ্ঠান কেইখনতো দেখিবলৈ পোৱা গৈছে অনুৰূপ দৃশ্যয়ে।

ক’ৰ’না মহামাৰীৰ ভয়াৱহতাই প্ৰভাৱ পেলাইছে ভক্তপ্ৰাণ ৰাইজে পূজা উদযাপনৰ ক্ষেত্ৰত তথা প্ৰতিষ্ঠান কেইখনত বিশ্বকৰ্মাৰ মৃন্ময় মূৰ্তি নিৰ্মাণৰ ক্ষেত্ৰতো।

পুৰণিগুদাম আৰু চামগুৰিৰ বৃহত্তৰ অঞ্চলত এইবাৰ বিশ্বকৰ্মাৰ পূজা পাতি ৰাজহুৱা স্থানত জনসমাগম কৰাৰ পৰিৱৰ্তে বৃহত্তৰ অঞ্চলটোৰ অধিকাংশ লোকেই নিজৰ ঘৰতে সৰুকৈয়ে পৰম্পৰাগত ৰীতি-নীতি অনুসৰি বিশ্ব খনিকৰ বিশ্বকৰ্মাক কৰিব অৰ্চন-বন্দন।

যাৰ বাবে পূৰ্বৰ তুলনাত বহু কমকৈ বিশ্বকৰ্মাৰ মৃন্ময় মূৰ্তি নিৰ্মাণ কৰিছে গটঙাৰ মূৰ্তিকাৰৰ প্ৰতিষ্ঠান কেইখনত।

মূৰ্তি সমূহ তৈয়াৰ কৰোতে প্ৰয়োজন হোৱা সামগ্ৰী সমূহো এইবেলি নগাঁৱৰ পৰিৱৰ্তে গুৱাহাটীৰ পৰা অত্যাধিক দৰত ক্ৰয় কৰি আনিব লগীয়া হোৱাত প্ৰতিভাগ মূৰ্তিৰ দামো পূৰ্বৰ তুলনাত অধিক হ’ব বুলি জানিবলৈ দিয়ে বৃত্তিটোৰ সৈতে জড়িত মৃৎশিল্পী কেইজনে।

যিয়ে নহওঁক, মুঠতে এইবাৰ বৃহৎকায় বিশ্বকৰ্মাৰ মূৰ্তি নিৰ্মাণৰ পৰিৱৰ্তে ঘৰতে পূজা পাতিব পৰাকৈ ক্ষুদ্ৰ-ক্ষুদ্ৰ মুৰ্তি দিনটোৰ ভিতৰতে নিৰ্মাণ কৰি নিশাৰ ভিতৰত ভক্ত তথা গ্ৰাহকৰ হাতত তুলি দিবৰ বাবে এতিয়া চৰম ব্যস্ততা বাঢ়িছে গটঙাৰ প্ৰসিদ্ধ মূৰ্তিকাৰৰ প্ৰতিষ্ঠানৰ কেইখনৰ মৃৎশিল্পী সকলৰ মাজত।