ৰাষ্ট্ৰীয় উশ্বু প্ৰতিযোগিতাত অসমলৈ সুনাম অৰ্জন কঢ়িয়াই অনা দলটি নিজ গৃহত উপস্থিত

২০ সংখ্যক ৰাষ্ট্ৰীয় ছাব-জুনিয়ৰ উশ্বু প্ৰতিযোগিতাত অসমলৈ সুনাম কঢ়িয়াই অনা বিশ্বনাথৰ দলটি চতিয়াত উপস্থিত হৈছেহি।

ঝাৰখণ্ডৰ ৰাঁচীত অনুষ্ঠিত হোৱা প্ৰতিযোগিতাৰ পৰা অসমক প্ৰতিনিধিত্ব কৰা  দলটি দেওবাৰে নিজগৃহত উপস্থিত হয় ৷

চতিয়াত বিশ্বনাথৰ দলটিক উষ্ম আদৰণি জনোৱা হয় ৷

চতিয়াৰ  বিশিষ্ট সমাজকৰ্মী বিষ্ণু বৰুৱাই আঁতধৰা অভিনন্দন অনুষ্ঠানত চতিয়াৰ বিশিষ্ট ব্যক্তিসকলে প্ৰশিক্ষক তথা খেলুৱৈসকলক একোখনকৈ ফুলাম গামোচাৰে অভিনন্দন জনায় ৷

অসম দলৰ হৈ বিশ্বনাথৰ ৫ জনকৈ খেলুৱৈয়ে অংশগ্ৰহণ কৰি ৫ টাকৈ পদক অৰ্জন কৰিবলৈ সক্ষম হয় ৷

দলটোৱে মুঠতে ২ টা সোণ, ১ টা ৰূপ আৰু ২ টা বঞ্জৰ পদক লাভ কৰে ৷

উল্লেখ্য যে অসমৰ দলটিয়ে মুঠ ২৮ টাকৈ পদক অৰ্জন কৰি টাওলু শাখাত দ্বিতীয় ৰানাৰ্ছ আপ আৰু সামগ্ৰিকভাৱে দ্বিতীয় শ্ৰেষ্ঠ দলৰ খিতাপ অৰ্জন কৰিবলৈ সক্ষম হয় ৷