কোভিডত আক্ৰান্ত হৈ মৃত্যু ৰাজ্যসভাৰ বিজেপিৰ সাংসদ অশোক গাষ্টিৰ

ৰাজ্যসভালৈ নতুনকৈ নিৰ্বাচিত সাংসদ তথা কৰ্ণাটক বিজেপিৰ নেতা অশোক গাষ্টিৰ ক’ৰ’ণা ভাইৰাছত আক্ৰান্ত হৈ মৃত্যু ঘটিছে।

মৃত্যুৰ সময়ত তেওঁৰ বয়স হৈছিল ৫৫ বছৰ।

চলিত বৰ্ষৰ ২২ জুলাইত ৰাজ্যসভাৰ সাংসদ হিচাবে শপতগ্ৰহণ কৰা গাষ্টি ২ ছেপ্তেম্বৰৰ দিনা ক’ৰ’ণা ভাইৰাছত আক্ৰান্ত হোৱাৰ কথা নিশ্চিত কৰা হৈছিল।

ইয়াৰ পিছতে সাংসদগৰাকীক বাংগালুৰুৰ মণিপাল হাস্পাতালত ভৰ্তি কৰোৱা হৈছিল।

বিগত কিছুদিন ধৰি তীব্ৰ জ্বৰত ভোগা সাংসদগৰাকীয়ে উশাহ-নিশাহতো কষ্ট পাবলৈ ধৰিছিল।

ফলত তেওঁক ভেণ্টিলেটৰত ৰখাৰ ব্যৱস্থা কৰা হৈছিল। আজি বিয়লি চিকিৎসাধীন অৱস্থাতে সাংসদ গাষ্টিয়ে শেষ নিশ্বাস ত্যাগ কৰে।

বিজেপিৰ ছাত্ৰ সংগঠন অখিল ভাৰতীয় বিদ্যাৰ্থী পৰিষদৰ সৈতে সৰুৰে পৰা জৰিত থকা গাষ্টিয়ে ১৮ বছৰ বয়সতে বিজেপিত যোগদান কৰিছিল বুলি তেওঁৰ ঘনিষ্ঠ মহলে প্ৰকাশ কৰিছে।

গাষ্টিয়ে কৰ্ণাটকৰ পিছপৰা শ্ৰেণীৰ লোকসকলৰ আয়োগৰো অধ্যক্ষ হিচাবে ২০১২ চনলৈ কাৰ্যনিৰ্বাহ কৰিছিল।

পেছাত এগৰাকী প্ৰখ্যাত অধিবক্তা গাষ্টিয়ে কৰ্ণাটকৰ ৰাইচুৰ জিলাৰ লগতে ৰাজ্য খনৰ বিভিন্ন প্ৰান্তত বিজেপিৰ সাংগঠনিক ভিত্তি সৱল কৰাত গুৰুত্বপূৰ্ণ ভূমিকা পালন কৰিছিল।

গাষ্টি আৰ এছ এছৰো এগৰাকী সক্ৰিয় সদস্য আছিল।

সাংসদগৰাকীৰ মৃত্যুত প্ৰধানমন্ত্ৰী মোডীকে ধৰি বিভিন্ন জনে গভীৰ শোক প্ৰকাশ কৰিছে।