শিৱসাগৰত বিজেপি কৰ্মীৰ প্ৰহাৰত আহত ই-ৰিক্সা চালক; এতিয়াও অভিযুক্তক কৰায়ত্ত কৰা নাই আৰক্ষীয়ে

শিৱসাগৰৰ এগৰাকী ই-ৰিক্সা চালকক বিজেপি কৰ্মীয়ে গুৰুলা গুৰুলকৈ প্ৰহাৰ কৰাৰ পিছতো অভিযুক্তৰ বিৰুদ্ধে কোনো পদক্ষেপ নোলোৱা বুলি আৰক্ষীৰ বিৰুদ্ধে অভিযোগ উত্থাপিত হৈছে। 

ৰঞ্জন জ্যোতি দাস নামৰ ই-ৰিক্সা চালকজনে উত্থাপন কৰিছে এই অভিযোগ। 

অভিযোগ অনুসৰি, যোৱা ৯ মাৰ্চত পৌৰসভা নিৰ্বাচনৰ ফলাফল ঘোষণাৰ পিছতে শিৱসাগৰৰ ৭ নং ৱাৰ্ডৰ জয়ী হোৱা বিজেপি প্ৰাৰ্থীগৰাকীৰ আত্মীয় তথা কেইগৰাকীমান সমৰ্থকে ৰেলীত অংশগ্ৰহণ কৰিবলৈ ৰঞ্জন জ্যোতি দাসৰ ই-ৰিক্সাখন ভাড়ালৈ লৈছিল। 

লগতে পঢ়ক: কোকৰাঝাৰ চহৰৰ মাজমজিয়াত ভূ-মাফিয়াৰ দপদপনি; বেদখল কৰিলে বিশাল চৰকাৰী ভূমি

নিশালৈকে ই-ৰিক্সাখনৰ ভাড়া হৈছিল ৮০০ টকা। এই প্ৰাপ্য টকা কেইটা বিচৰা বাবেই ৰঞ্জন জ্যোতি দাসক গুৰুলা গুৰুলকৈ প্ৰহাৰ কৰে। মূৰ আৰু মুখমণ্ডলত গুৰুতৰভাৱে আঘাতপ্ৰাপ্ত হোৱা ৰঞ্জন জ্যোতি দাসে থানাত এজেহাৰ দিয়াত ১২০/২০২২ নম্বৰ গোচৰৰ  ভিত্তিত ভাৰতীয় দণ্ডবিধি আইনৰ অধীনত ৩৪১/৩২৫/৩৪ গোচৰটো ৰুজু কৰে । 

কিন্তু পৰিতাপৰ বিষয় যে এই পৰ্যন্ত অভিযুক্ত বিজেপি কৰ্মী কেইগৰাকীক কৰায়ত্ত নকৰা বুলি ক্ষোভ প্ৰকাশ কৰিছে ঘটনাৰ বলি ৰঞ্জন জ্যোতি দাসে।