ৰাজস্থানত ‘ব্লেক ফাংগাছ’ৰ সংক্ৰমণক ‘মহামাৰী’ হিচাবে ঘোষণা
এনেয়ে মৰো ৰজাৰ শাপত, তাতে দিয়ে ধানৰ ভাপত জাতীয় কথাই হৈছে এতিয়া দেশত। ক’ৰ’নাৰ মহাসংক্ৰমণৰ সময়তে দেশৰ বিভিন্ন স্থানত স্বাস্থ্য সম্পৰ্কীয় প্ৰত্যাহ্বান হিচাবে থিয় দিছে আন এক সমস্যাই।
সেয়া হৈছে ব্লেক ফাংগাছৰ সমস্যা। কোভিডত আক্ৰান্ত লোকসকলেই মূলতঃ ব্লেক ফাংগাছৰ সংক্ৰমণৰ চিকাৰ হ’বলগীয়া হৈছে। দিল্লীকে ধৰি দেশৰ বহু ৰাজ্যত ব্লেক ফাংগাছে ত্ৰাসৰ সৃষ্টি কৰিছে। মৰুৰ ৰাজ্য ৰাজস্থানতো ব্লেক ফাংগাছৰ বিভীষিকাই জনতাত শংকিত কৰি তুলিছে।
এনে পৰিস্থিতিত ৰাজস্থানৰ চৰকাৰে ব্লেক ফাংগাছৰ সংক্ৰমণক মহামাৰী হিচাবে ঘোষণা কৰিবলৈ বাধ্য হৈছে। ৰাজ্য খনৰ কেৱল জয়পুৰস্থিত চাৱাই মানসিং হস্পিতালতে ১০০ গৰাকী ব্লেক ফাংগাছৰ দ্বাৰা আক্ৰান্ত ৰোগীৰ চিকিৎসা চলায় থকা হৈছে।
ব্লেক ফাংগাছৰ বৈজ্ঞানিক নাম হৈছে Mucormycosis, আৰু এই ফাংগাছে আক্ৰমণ কৰা অংশ আনকি কাটি পেলাবলগীয়া পৰ্যন্ত হয়।
ৰাজাস্থানৰ চৰকাৰে সেয়ে ৰাজ্য খনৰ মহামাৰী আইন ২০২০ ৰ অধীনত ব্লেক ফাংগাছৰ সংক্ৰমণক মহামাৰী হিচাবে ঘোষণা কৰিছে। ৰাজস্থানৰ স্বাস্থ্য বিভাগৰ প্ৰধান সচিব অখিল অৰোৰাই প্ৰকাশ কৰা মতে এই মাৰক ফাংগাছ বিধৰ সংক্ৰমণ ৰোধ আৰু প্ৰণালীবদ্ধ চিকিৎসাৰ বাবেই ফাংগাছ বিধৰ সংক্ৰমণক মহামাৰী হিচাবে ঘোষণা কৰা হৈছে।
ব্লেক ফাংগাছে মানুহৰ মগজুকে ধৰি আন বহু অংগত আক্ৰমণ কৰে।