গুৱাহাটী সমষ্টিক লৈ কংগ্ৰেছ নেতৃত্বই এতিয়াও আন্ধাৰত ৰাখিছে প্ৰাৰ্থিত্ব প্ৰত্যাশীক

গুৱাহাটী সমষ্টিত কংগ্ৰেছৰ প্ৰাৰ্থীৰ নামক লৈ বাৰে বাৰে সলনি হৈছে ৰাজনৈতিক মহলৰ “পূৰ্বানুমান”। এইবাৰ আহিছে ববিতা শৰ্মাৰ নাম চূড়ান্ত হোৱাৰ “বিশ্বস্ত খবৰ”।

হাই প্ৰফাইল সমষ্টিটোৰ বাবে বিজেপিয়ে কেতিয়াবাই প্ৰাৰ্থীৰ নাম ঘোষণা কৰিলেও কংগ্ৰেছ নেতৃত্বই এতিয়াও কাৰো নাম ঘোষণা কৰা নাই। ফলত দলটোৰ প্ৰাৰ্থিত্ব প্ৰত্যাশীসকলে জল্পনা-কল্পনাৰ মাজতে দিন গণিব লগীয়া হৈছে।

সমষ্টিটোত এবাৰ ৰমেন বৰঠাকুৰ, এবাৰ ৰবীন বৰদলৈৰ নাম চূড়ান্ত বুলি ওলোৱাৰ পিছতো কোনো এজনৰ নামেই নিশ্চিত খবৰ হৈ অহা নাই। তাৰ মাজতে দিল্লীত শীৰ্ষ নেতৃত্বৰে কিৰিপ চলিহাৰ যোগাযোগৰ খবৰেও কাণ ফুৰি গ’ল ৰাজ্যৰ ৰাজনৈতিকমহলৰ।

অতি শেহতীয়াকৈ এইবাৰ ওলাইছে ববিতা শৰ্মাৰ নাম। ববিতা শৰ্মাৰ নাম সমষ্টিটোত চূড়ান্ত কৰিছে, কেৱল ঘোষণাহে বাকী আছে বুলি এটা সূত্ৰই দাবী কৰিছে।

অৱশ্যে নৰ্থ-ইষ্ট নাওৰ পৰা যোগাযোগ কৰাত মন্তব্য কৰিবলৈ “অস্বীকাৰ কৰে” কংগ্ৰেছ নেত্ৰীগৰাকীয়ে।

প্ৰসংগক্ৰমে ক’ব পাৰি যে বিজেপিয়ে সমষ্টিটোত কেইবাজনো শক্তিশালী দাবীদাৰ থকা সত্ত্বেও কুইন ওজাক টিকট দিছে।

আনহাতে কংগ্ৰেছে এই পৰ্য্যন্ত যিসকলক টিকট দিছে তাৰ ভিতৰত কেৱল সুস্মিতা দেবহে মহিলা। মহিলাৰ অনুপাত বৃদ্ধি কৰাক এটা লক্ষ্য হিচাপে লৈ দলটোৱে ববিতা শৰ্মাক টিকট দিয়াটো অবিশ্বাস্যও নহয়।

কাইলৈৰ ভিতৰত সমষ্টিটোৰ প্ৰাৰ্থীৰ নাম দলৰ তৰফৰ পৰা প্ৰকাশ কৰাৰ সম্ভাৱনা আছে।

দলটোৱে বৰপেটা, ধুবুৰী আৰু কোকৰাঝাৰৰ বাবেও প্ৰাৰ্থীৰ নাম এতিয়ালৈকে ঘোষণা কৰা নাই।