পাঠশালাৰ সৰবৰহী মহিলা লক্ষ্মী দেৱীৰ মৰণোত্তৰভাৱে দেহদান

বৰপেটা জিলাৰ পাঠশালাৰ সৰবৰহী মহিলা লক্ষ্মী দেৱীৰ দেহটো আজি মৰণোত্তৰভাৱে বৰপেটাৰ ফখৰুদ্দিন আলী আহমেদ চিকিৎসা মহাবিদ্যালয়ত দান কৰা হয়। উল্লেখযোগ্য যে লক্ষ্মী দেৱীয়ে ২০১৭ চনৰ ১৭ এপ্ৰিলত এক ইচ্ছাপত্ৰৰ জৰিয়তে নিজৰ দেহটো চিকিৎসা মহাবিদ্যালয়ত দান কৰিছিল।

চি পি আই (এম)ৰ আদৰ্শৰে লক্ষ্মী দেৱীয়ে মৃত্যুৰ আগমুহুৰ্তলৈকে অঞ্চলটোত অন্ধ বিশ্বাস আৰু কু-সংস্কাৰৰ বিৰুদ্ধে কাম-কাজ কৰি আহিছিল।

সৰবৰহী মহিলা গৰাকীৰ ইচ্ছা অনুসৰি পৰিয়ালৰ লোকে আজি লক্ষী দেৱীৰ মৃতদেহতো বৰপেটাৰ ফখৰুদ্দিন আলী আহমেদ চিকিৎসা মহাবিদ্যালয়ত দান কৰে। মৃতদেহতো দান কৰাৰ সময়ত লক্ষ্মী দেৱীৰ জ্যেষ্ঠ পুত্ৰ-বোৱাৰীৰ লগতে দুগৰাকী কন্যা, আত্মীয় স্বজন আৰু চি পি আই (এম)ৰ নেতা আজিজুৰ ৰহমান আৰু চানমামুদ উপস্থিত থাকে।

মৃতদেহতো গ্ৰহণ কৰি চিকিৎসা মহাবিদ্যালয়খনৰ এনাট’মী বিভাগৰ মুৰব্বী অধ্যাপক ডাঃ জয়শ্ৰী দেৱীয়ে ‘চিকিৎসা বিজ্ঞানৰ উন্নয়নৰ বাবে দেহ দান অতিকৈ জৰুৰী’ বুলি উল্লেখ কৰি লক্ষ্মী দেৱীৰ কৰা দেহদানৰ প্ৰতি অনুপ্ৰাণিত হৈ অইন ব্যক্তিয়েও দেনদান কৰিব বুলি আশা ব্যক্ত কৰে ৷