ভাৰতীয় ৰিজাৰ্ভ বেংক বোমাৰে উৰুৱাই দিয়াৰ ভাবুকি; মেইল অহাৰ পিছতে চহৰজুৰি আতংক

ভাৰতীয় ৰিজাৰ্ভ বেংক (Reserve Bank of India)লৈ প্ৰেৰণ কৰা হৈছিল বোমা বিস্ফোৰণৰ ভাবুকি। ২৬ ডিচেম্বৰ অৰ্থাৎ মঙলবাৰে আৰ বি আইৰ মুম্বাই শাখাৰ ইমেইল আই ডিলৈ ভাবুকিপূৰ্ণ মেইল ​​প্ৰেৰণ কৰা হৈছিল। তাত অচিনাকি দুষ্কৃতিকাৰীয়ে দেশৰ কেন্দ্ৰীয় বেংকটোক বোমাৰে উৰুৱাই দিয়াৰ ভাবুকি দিয়ে।

অৱশ্যে কেৱল আৰ বি আইয়েই নহয়, আন দুটা চৰকাৰী বেংকৰ শাখালৈও এই ভাবুকিপূৰ্ণ ইমেইল প্ৰেৰণ কৰা হৈছিল। সেই বেংক দুটা হৈছে ক্ৰমে এইচ ডি এফ চি আৰু আই চি আই চি আই।

লগতে পঢ়কঃ নতুন মাইলৰ খুঁটি গঢ়াৰ পথত ইছৰো! কৃষ্ণগহ্বৰ আৰু নিউট্ৰন ষ্টাৰৰ সন্ধানত উৎক্ষেপণ হ’ব XPoSAT

আৰক্ষীৰ সূত্ৰ অনুসৰি, এই ভাবুকিমূলক ইমেইলসমূহ ‘খিলাফত ইণ্ডিয়া’ নামৰ ইমেইল আইডিৰ পৰা প্ৰেৰণ কৰা হৈছে। মুম্বাই আৰক্ষীৰ সূত্ৰৰ মতে, ভাবুকি ইমেইলসমূহত মুম্বাইৰ ১১টা ভিন্ন স্থানত বোমা স্থাপনৰ কথা উল্লেখ কৰা হৈছে।

ভাবুকি প্ৰদানকাৰীৰ দাবী, ব্যক্তিগত বেংকৰ লগতে আৰ বি আইয়ে ভাৰতৰ ইতিহাসত সৰ্বাধিক প্ৰৱঞ্চনা সংঘটিত কৰিছে। ফলত আৰ বি আইৰ গভৰ্ণৰ শক্তিকান্ত দাস আৰু কেন্দ্ৰীয় বিত্তমন্ত্ৰী নিৰ্মলা সীতাৰমণৰ পদত্যাগৰ দাবী কৰা হৈছে।

মঙলবাৰে বিয়লি ১:৩০ বজাত বিস্ফোৰণ সংঘটিত হ’ব বুলি দাবী কৰা হৈছিল। কিন্তু কোনো বিস্ফোৰণ নঘটিল। ঘটনাৰ খবৰ পাই ততাতৈয়াকৈ এটা বৃহৎ আৰক্ষী বাহিনী ঘটনাস্থলীত উপস্থিত হয়।

লগতে পঢ়কঃ ভাৰতীয় আৰক্ষী সেৱাৰ পৰা পদত্যাগ লখিমপুৰৰ আৰক্ষী অধীক্ষক আনন্দ মিশ্ৰৰ

মুম্বাই আৰক্ষীৰ বোম স্কোয়াডে বিভিন্ন স্থানত পুংখানুপুংখ তালাচী চলায়। অৱশ্যে তালাচীৰ সময়ত কোনো বিস্ফোৰক সামগ্ৰী পোৱা নগ’ল।