ভাৰতীয় মহাকাশ বিজ্ঞান গৱেষণা কেন্দ্ৰ ইছৰ’ই দেশৰ প্ৰথমটো এক্স-ৰে প’লাৰিমিটাৰ উপগ্ৰহ বা XPOSAT উৎক্ষেপণ কৰিবলৈ ওলাইছে। ইছৰোৱে এইবাৰ এক্সপ’ছেটৰ জৰিয়তে কৃষ্ণগহ্বৰ আৰু নিউট্ৰন ষ্টাৰৰ সন্ধান কৰিবলৈ এই নতুন পদক্ষেপ গ্ৰহণ কৰিছে। এই উপগ্ৰহটো প’লাৰ চেটেলাইট লঞ্চ ভেহিকেল চি ৫৮ ৰ জৰিয়তে উৎক্ষেপণ কৰা হ’ব।
উল্লেখ্য যে ইছৰ’ই এইবাৰ চন্দ্ৰযান ৩ক নিজৰ লক্ষ্যত সফলতাৰে প্ৰেৰণ কৰিছে। চন্দ্ৰৰ দক্ষিণ মেৰুত সফলতাৰে অৱতৰণ কৰিছে ভাৰতৰ চন্দ্ৰযান ৩। তাৰপিছতে আদিত্য এল ১ৰ সহায়ত ইছৰ’ই সৌৰ গৱেষণাৰ ক্ষেত্ৰত বৃহৎ সফলতাৰ বাবে সাজু হৈছে।
এইবাৰ ইছৰ’ই আন কিছুমান মহাজাগতিক পৰিঘটনাৰ বিষয়ে গৱেষণামূলক তথ্যৰ সন্ধান বিচাৰি উলিয়াব বিচাৰিছে। আৰু সেইটোৱেই হৈছে এক্সপ’জেট উৎক্ষেপণৰ লক্ষ্য।
লগতে পঢ়কঃ ভাৰতীয় আৰক্ষী সেৱাৰ পৰা পদত্যাগ লখিমপুৰৰ আৰক্ষী অধীক্ষক আনন্দ মিশ্ৰৰ
জানিব পৰা মতে, ইছৰ’ই নতুন বছৰৰ প্ৰথম দিনাই এই নতুন এক্সপ’জেট উৎক্ষেপণ কৰিবলৈ ওলাইছে। এই কথা জনাইছে দেশৰ মহাকাশ গৱেষণা বিজ্ঞান কেন্দ্ৰটোৱে। সেইদিনা ৰাতিপুৱা ৯.১০ বজাত এক্সপ’জেট সফলতাৰে উৎক্ষেপণ কৰাৰ কথা। এইটো ভাৰতীয় মহাকাশ গৱেষণাৰ ক্ষেত্ৰত অন্যতম মাইলৰ খুঁটি হোৱাৰ বাবে আগবাঢ়িছে বুলি কোৱা হৈছে।
ইছৰোৰ এই উপগ্ৰহটোৱে গভীৰ এক্স-ৰে উৎসৰ বিকিৰণৰ দিশৰ সৈতে জড়িত এক অধ্যয়নৰ বিভিন্ন দিশ অন্বেষণ কৰিবলৈ ওলাইছে। এই পদক্ষেপত যদি ইছৰো সফল হয় তেন্তে ই ভাৰতীয় মহাকাশ গৱেষণা আৰু বিজ্ঞানৰ জগতখনত এক বৃহৎ অগ্ৰগতি আনিব পাৰে।
ইতিমধ্যে ইছৰ’ই আদিত্য এল ১ৰ সফলতাৰ বাবে অপেক্ষা কৰি আছে। জানিব পৰা গৈছে যে এক্সপ’জেট মহাকাশৰ ৫০টা উজ্জ্বল বস্তুৰ ওপৰত গৱেষণাৰ বাবে তথ্য সংগ্ৰহৰ বাবে উৎসৰ্গিত। ইয়াৰ ভিতৰত ব্লেকহোল বা কৃষ্ণগহ্বৰ, এক্টিভ গ্যালাক্টিক নিউক্লিআই, নিউট্ৰন ষ্টাৰ, নন থাৰ্মল ছুপাৰন’ভা আদি অন্যতম।
লগতে পঢ়কঃ চাণক্য নীতি : কেনেকৈ চিনাক্ত কৰিব জীৱনৰ শত্ৰু? জানি লওক আজিয়েই
এই নতুন অভিযানৰ কাৰ্যকাল ৫ বছৰ। জানিব পৰা মতে এই উপগ্ৰহটো পৃথিৱীৰ কক্ষপথৰ পৰা ৫০০ৰ পৰা ৭০০ কিলোমিটাৰ দূৰত্বত থাকিব। উল্লেখ্য যে ৰমন গৱেষণা প্ৰতিষ্ঠান, ইউ আৰ ৰাও উপগ্ৰহ কেন্দ্ৰই ইছৰোৰ এই পদক্ষেপত সহযোগিতা আগবঢ়াইছে। এই পদক্ষেপৰ ফলত লাভ কৰা তথ্যই ভাৰতৰ মহাকাশ গৱেষণাৰ বিভিন্ন দিশত সফলতা আনিব বুলি ধাৰণা কৰা হৈছে।
