বেয়া দিনে লগ এৰা নাই ছাকিব উলৰ; বুলবুলত বিধ্বস্ত তেওঁৰ হেঁপাহৰ কেঁকোৰাৰ পাম
ভাল দিন চলা নাই বাংলাদেশৰ ক্ৰিকেট তাৰকা ছাকিব উল হাছানৰ। এক বেয়া দিনৰ মাজেৰে সময় পাৰ কৰিবলগীয়া হৈছে বাংলাদেশৰ জনপ্ৰিয় ক্ৰিকেটাৰগৰাকীয়ে।
ক্ৰিকেটৰ পৰা নিৰ্বাসিত হোৱাৰ পাছত কেঁকোৰাৰ ব্যৱসায়ত মন দিছিল ছাকিবে। সেইদৰে তেওঁ ইয়াৰ কাম আৰম্ভও কৰিছিল। কিন্তু কালান্তক ঘুৰ্ণী বুলবুলৰ প্ৰকোপত বিধ্বস্ত হৈ পৰিল ছাকিবৰ কোঁকোৰাৰ পাম।
বিশ্বৰ অন্যতম শ্ৰেষ্ঠ অলৰাউণ্ডাৰ হিচাপে নিজকে প্ৰতিষ্ঠা কৰা ক্ৰিকেটাৰগৰাকীক ভাগ্যই লগ দিয়া নাই।
বুকিৰ পৰা মেচ ফিক্সিঙৰ প্ৰস্তাৱ লাভ কৰাৰ কথা গোপনে ৰখাৰ বাবে শাস্তি ভোগ কৰিবলগীয়া হৈছে ছাকিবে। আই চি চিৰ নিৰ্দেশত তেওঁ এবছৰৰ বাবে ক্ৰিকেটৰ পৰা নিৰ্বাসিত হৈছে।
ক্ৰিকেটৰ পৰা আঁতৰি থাকিবলগীয়া হোৱা ছাকিব ফুটবল খেলত নামি পৰিছিল। অৱশ্যে সেয়া আছিল তেওঁৰ খেলৰ প্ৰতি থকা দুৰ্বাৰ আকৰ্ষণৰ প্ৰতিফলন।
নিৰ্বাসনৰ সময়ছোৱাত ছাকিবে তেওঁৰ ব্যৱসায়ত অধিক মনোনিৱেশ কৰাৰ পৰিকল্পনা কৰিছিল। এনেয়ে তেওঁৰ একাধিক ব্যৱসায় আছে যদিও বৰ্তমান দেশখনৰ সাতখিৰা জিলাৰ শ্যামনগৰত বহু টকা বিনিয়োগ কৰি কোঁকোৰা আৰু মিছা মাছৰ পাম গঢ়ি তুলিছিল।
কিন্তু ঘুৰ্ণী বতাহ বুলবুলে তেওঁৰ সেই হেঁপাহৰ পাম তচনচ কৰি পেলায়। ঘুৰ্ণীত সেই গাঁৱখনৰ প্ৰায়ভাগ ঘৰ-বাৰী ভাঙিছে। ছাকিবৰ পামৰ ঘৰকে ধৰি ঘেৰ দিয়া টিনৰ বেৰ আদিও ভাঙিছে।
বৰ্তমান পামখন বন্ধ হৈ পৰিছে। শীতৰ তিনিমাহ কেঁকোৰা নাপায়। গতিকে তেওঁৰ প্ৰকল্পটো বন্ধ হৈছে। কিন্তু পামখনৰ পুখুৰীবোৰ কেঁকোৰাৰ খেতিৰ কাৰণে প্ৰস্তুত কৰি থকাৰ মাজতে বুলবুলৰ প্ৰভাৱত পুখুৰীবোৰ পানীৰে ভাহি গৈছে।