অবিশ্বাস্য: মাত্ৰ ৮৫ টকাতে ক্ৰয় কৰিব পাৰিব একোটা আটক ধুনীয়া ঘৰ, পঢ়ক ক’ত-কিয়
বজাৰত বয় বস্তুৰ চৰা দাম। ঘৰ বনোৱা সামগ্ৰীৰ দামেও আকাশ স্পৰ্শ কৰিছে। এনে সময়তে মাত্ৰ ৮৫ টকাতে এটা আটক ধুনীয়া ঘৰ কিনিব পৰাৰ কথা হয়তো সহজে বিশ্বাস কৰিব নোৱাৰা ধৰণৰ কথাই হ’ব।
কিন্তু অবিশ্বাস্য যেন লগা এই কথা সম্পূৰ্ণ সঁচা। মানুহে মাত্ৰ ৮৫ টকা খৰচ কৰিয়েই কিনিব পাৰিব একোটা ঘৰ।
এই বাম্পাৰ অফাৰ আগবঢ়োৱা হৈছে ইটালীত। ইটালীৰ দক্ষিণ-পশ্চিম প্ৰান্তৰ চিচিলিৰ কাষৰীয়া সৰু সৰু চহৰ সমূহৰ জনসংখ্যা এতিয়া লাহে লাহে কমি আহিবলৈ ধৰিছে।
বিশেষকৈ কামৰ সন্ধানত সেই সৰু চহৰ সমূহৰ বাসিন্দাসকলে ডাঙৰ চহৰলৈ গুচি যোৱাত তেনে চহৰ সমূহৰ ঘৰ বোৰ খালী হৈ পৰিছে।
চিচিলিৰ মুছোমেলি,ছালেমি আদি সৰু সৰু চহৰ সমূহৰ পৰা হাজাৰ হাজাৰ লোকে চিৰ দিনৰ বাবে বৃহৎ চহৰলৈ গুচি গৈছে।
ইটালীৰ প্ৰাচীন সভ্যতাৰ স্বাক্ষৰ বহন কৰি থকা এই চহৰ সমূহত খালী হৈ পৰা ঘৰ বোৰ সেয়ে নাম মাত্ৰ মূল্য লৈ বেচিবলৈ ওলাইছে চহৰ সমূহৰ পৌৰ সভাই।
ষোল্ল শতিকাৰ পৰাই ইটালীৰ ক্ৰমবিৱৰ্তনৰ সাক্ষী হৈ অহা ছালেমি চহৰৰ একোটা ঘৰৰ মূল্য পৌৰ সভাই নিৰ্দ্ধাৰণ কৰিছে ১ ইউৰো।
ভাৰতীয় মুদ্ৰাৰ হিচাবত এই ধনৰ পৰিমাণ প্ৰায় ৮৫ টকা।
১৯৬৮ চনৰে পৰাই এক শক্তিশালী ভূমিকম্প হোৱাৰ পিছত চহৰ খনৰ বাসিন্দাসকলে আন বৃহৎ চহৰলৈ ধাৱমান হ’বলৈ ধৰে। ফলত চহৰ খনৰ সুন্দৰ ঘৰ বোৰ এতিয়া খালী পৰি ৰৈছে।
একেদৰে ইটালীৰ প্লাটানি নৈৰ কাষত অৱস্থিত শতিকা প্ৰাচীন মুছোমেলি চহৰ খনৰ পৌৰ সভায়ো ১ ইউৰো দৰতে একোটা ঘৰ বিক্ৰী কৰিবলৈ ওলাইছে।
এই চহৰৰ জনসংখ্যা ১১ হাজাৰ আছিল যদিও চহৰ খনৰ বাসিন্দাসকলে ডাঙৰ ঔদ্যোগিক চহৰলৈ ঢাপলি মেলাত চহৰ খনৰ জনসংখ্যা লক্ষ্যণীয় হাৰত কমি গৈছে।
প্ৰাচীন চহৰ সমূহক জীৱন্ত কৰি ৰখাৰ বাবেই ভাৰতীয় মুদ্ৰাৰ হিচাবত মাত্ৰ ৮৫ টকাতে বিক্ৰী কৰা হৈছে একোটা ঘৰ।