লকডাউনৰ মাজতে জনসাধাৰণৰ স্বাৰ্থত ৰাজ্য চৰকাৰলৈ কেন্দ্ৰৰ জৰুৰী নিৰ্দেশ
খাদ্য সমাগ্ৰীৰ লগতে সকলো অত্যাৱশ্যকীয় সামগ্ৰীৰ পৰিবহনৰ ক্ষেত্ৰত দেখা দিয়া জটিলতাৰ প্ৰতি লক্ষ্য ৰাখি কেন্দ্ৰীয় গৃহ সচিবে সকলো ৰাজ্যৰে মুখ্য সচিবলৈ এখন পত্ৰ লিখি যিকোনো পৰিস্থিতিতে এন সামগ্ৰী কঢ়িওৱা ট্ৰাকসমূহৰ চলাচল নিশ্চিত কৰিবলৈ নিৰ্দেশ দিছে।
কেন্দ্ৰীয় গৃহ সচিব অজয় ভাল্লাই সকলো ৰাজ্য তথা কেন্দ্ৰীয় শাসিত প্ৰদেশলৈ লিখা পত্ৰখনত কঠোৰ নিৰ্দেশ দি কয়,’’মন্ত্ৰ্যালয়ে জানিব পাৰিছে যে অত্যাৱশ্যকীয় সামগ্ৰী কঢ়িয়াই অনা ট্ৰাকসমূহক দেশৰ কিছুমান অংশত বন্ধ কৰি ৰখা হৈছে।‘’
কেন্দ্ৰীয় চৰকাৰে ৰাজ্যসমূহক সকীয়াই দিছে যে যদি এনে অৱস্থা চলি থাকে তেতিয়াহ’লে অত্যাৱশ্যকীয় সামগ্ৰীৰ নাটনিৰ সন্মুখীন হ’বগীয়া হ’ব পাৰে।
সেইদৰে দেশৰ কিছুমান অংশত ক’ল্ড ষ্ট’ৰেজ আৰু ৱেৰহাউছত কাম কৰাৰ অনুমতি দিয়া হোৱা নাই। এই ফেক্টৰীসমূহত কাম কৰাৰ বাবে যিমান শ্ৰমিকৰ প্ৰয়োজন সিমান পাছ দিয়া হোৱা নাই।
তদুপৰি, কোনো এখন ৰাজ্যই ট্ৰাক তথা শ্ৰমিকক অহা যোৱাৰ বাবে দিয়া পাছ বা অনুমতি পত্ৰ আন ৰাজ্যই মানিবলৈ অস্বীকাৰ কৰিছে। এনেবোৰ কাৰণতে লকডাউনৰ সময়ত সামগ্ৰীৰ পৰিবহন বাধাগ্ৰস্ত হৈছে।
গৃহ মন্ত্ৰ্যালয়ে স্পষ্ট নিৰ্দেশ দিছে যে জৰুৰী বা অত্যাৱশ্যকীয় সামগ্ৰী কঢ়িওৱা ট্ৰাকক চালকৰ লগত উপযুক্ত অনুজ্ঞাপত্ৰ থাকিলে বাধাহীনভাৱে চলাচলৰ অনুমতি দিব লাগিব।
লগতে চালকৰ সৈতে তেওঁৰ সহায়কো যাব পাৰে। বিষয়াসকলে যাতে চালকৰ পৰা আন অনুমতি পত্ৰ নিবিচাৰে। তদুপৰি, সামগ্ৰী খালী কৰাৰ পাছত উভতি যাবলগীয়া ট্ৰাকসমূহক ৰাস্তাত বাধা দিব নোৱাৰিব। সেইদৰে ফেক্টৰীলৈ যোৱা শ্ৰমিককো অনুমতি দিব লাগিব।
গৃহ সচিবগৰাকীয়ে পত্ৰখনত কয়,’’এই নিয়ম কেন্দ্ৰীয় স্বাস্থ্য আৰু পৰিয়াল কল্যাণ মন্ত্ৰ্যালয়ৰ নিৰ্দেশনা অনুসৰি কোৱাৰেন্টাইন বা নিৰীক্ষণ ব্যৱস্থাৰ সৈতে সম্পৰ্কিত অঞ্চলক বাদ দি বাকী সকলো স্থানতে প্ৰযোজ্য হ’ব।‘’