আজি ৰাতিপুৱা ১০ বজাত প্ৰকাশ পাব চূড়ান্ত এন আৰ চি; অসমৰ ৰাইজক শান্তি-সম্প্ৰীতি অটুট ৰখাৰ আহ্বান মুখ্য মন্ত্ৰী সোণোৱালৰ

আজি ৰাজ্যত প্ৰকাশ পাবলগীয়া ৰাষ্ট্ৰীয় নাগৰিকপঞ্জীৰ সময়ছোৱাত অসমৰ জনসাধাৰণক শান্তি-সম্প্ৰীতি অটুত ৰাখিবলৈ আহ্বান জনাইছে মুখ্য মন্ত্ৰী সৰ্বানন্দ সোণোৱালে।

আজি এক বিবৃতিযোগে মুখ্য মন্ত্ৰী সোণোৱালে কয় যে উচ্চতম ন্যায়ালয়ৰ নিৰীক্ষণত ভাৰতৰ মহাপঞ্জীয়কৰ তত্ত্বাবধানত এন আৰ চিৰ ৰাজ্যিক সমন্বয়কৰ দ্বাৰা শনিবাৰে এন আৰ চিৰ চূড়ান্ত তালিক ৰাজহুৱাকৈ প্ৰকাশ পাব।

বৰাক-ব্ৰহ্মপুত্ৰ, পাহাৰ-ভৈয়ামৰ জনসাধাৰণৰ সহযোগত, কেন্দ্ৰ আৰু ৰাজ্য চৰকাৰৰ যৌথ সহযোগিতাৰে এন আৰ চিক চূড়ান্ত ৰূপ দিয়াৰ ক্ষেত্ৰত জনসাধাৰণে আন্তৰিকতাৰে অংশগ্ৰহণ কৰিছে বুলি সোণোৱালে কয়।

মুখ্য মন্ত্ৰীয়ে কয় যে এন আৰ চিৰ চূড়ান্ত তালিকা প্ৰকাশৰ সময়ত অসমৰ সমূহ জনসাধাৰণে পূৰ্বৰ দৰে আন্তৰিকতাৰে সহযোগিতা আগবঢ়াব।

এন আৰ চিৰ অংশ খচৰা আৰু পূৰ্ণ খচৰা প্ৰকাশৰ সময়ত বহু শক্তিয়ে অপপ্ৰচাৰ চলাইছিল বুলি উল্লেখ কৰি মুখ্য মন্ত্ৰীয়ে কয় যে অসমৰ ৰাইজৰ সহযোগিতাৰ বাবে শান্তিপূৰ্ণ পৰিৱেশ অব্যাহত আছিল।

এন আৰ চিৰ চূড়ান্ত তালিকাত নাম নাথাকিলেও নূন্যতম চিন্তা কৰিবলগীয়া নাই বুলি উল্লেখ কৰি মুখ্য মন্ত্ৰীয়ে কয় যে ইতিমধ্যে এই সন্দৰ্ভত কেন্দ্ৰীয় গৃহ মন্ত্ৰালয়ে বিবৃতিযোগে স্পষ্ট কৰি দিছে যে যিসকলৰ নাম বাদ পৰিব তেখেতসকলে বিদেশী ন্যায়াধীকৰণত আবেদন কৰাৰ সুযোগ লাভ কৰিব।

পূৰ্বতে আবেদন কৰাৰ সময় সীমা ৬০ দিন আছিল যদিও ৰাইজৰ সুবিধা-অসুবিধাৰ প্ৰতি লক্ষ্য ৰাখি ৬০ দিনৰ পৰিৱৰ্তে ১২০ দিনলৈ বৃদ্ধি কৰিছে।

আনহাতে, যিসকলে চৰকাৰৰ পৰা আইনী সাহায্য বিচাৰিব সেইসকলক আইনী সাহায্যও দিয়া হ’ব বুলি সোণোৱালে কয়।

কেনেও এন আৰ চি প্ৰকাশৰ সময়ত ভীতিগ্ৰস্ত আৰু শংকিত হ’ব নালাগে। মুখ্য মন্ত্ৰীয়ে লগতে কয় যে যিমানে অপপ্ৰচাৰ নকৰক কিয় এন আৰ চি উন্নীতকৰণৰ প্ৰক্ৰিয়াটোত ৰাইজে আন্তৰিকতাৰে সহযোগিতা আগবাঢ়াই আহিছে।

ভাৰতৰ মহাপঞ্জীয়ক তথা ৰাজ্যিক এন আৰ চি সমন্বয়কক ৰাইজে সহযোগিতা আগবঢ়াই আহিছে বুলি মুখ্য মন্ত্ৰীয়ে কয়।

মুখ্য মন্ত্ৰীয়ে কয় যে কাইলৈ প্ৰকাশ পাবলগীয়া এন আৰ চিৰ চূড়ান্ত তালিকাৰ সময়টো জনসাধাৰণে আন্তৰিকতাৰে সহযোগিতা কৰিব।

মুখ্য মন্ত্ৰীয় কয় যে চৰকাৰ যি কোনো সমস্যাৰ ক্ষেত্ৰত জনসাধাৰণৰ ওচৰত আছে। এন আৰ চিত নাম অন্তৰ্ভু্ত নোহোৱা লোকসকলৰ সুধিবলগীয়া বিষয় সমূহ জিলা প্ৰশাসনক অৱগত কৰিব পাৰিব আৰু জিলা প্ৰশাসনে এই ক্ষেত্ৰত সকলো ধৰণৰ সহায়-সহযোগিতা আগবঢ়াব বুলিও মুখ্য মন্ত্ৰীয়ে কয়।