অৰুণাচলৰ চৌখামত অস্ত্ৰ-শস্ত্ৰ সহ আটক দুৰ্ধৰ্ষ ই এন এন জি কেডাৰ

তিনিচুকীয়া জিলাৰ সীমান্তবর্তী ৰাজ্য অৰুণাচলৰ প্ৰদেশৰ চৌখামত শুকুৰবাৰে নিষিদ্ধ ঘোষিত নগা উগ্ৰপন্থী সংগঠন ইষ্টাৰ্ণ নাগা নেচনেল গভৰ্মেণ্ট চমুকৈ ইএনএনজি (The Eastern Naga National Government-ENNG) এগৰাকী কেডাৰক আটক কৰা হয়।

ভাৰতীয় সেনাৰ ২০ নং মাদ্ৰাজ ৰেজিমেণ্ট আৰু আৰক্ষীৰ যুটীয়া অভিযানত আটক হোৱা কেডাৰগৰাকী চাৰ্জেণ্ট মেজৰ কালিঞ্জয় চাকমা ওৰফে বাংগালো চাকমা বুলি জানিব পৰা গৈছে।

বিশেষ সূত্ৰৰ ভিত্তিত অভিযান চলাই দুৰ্ধৰ্ষ ই এন এন জি কেডাৰজনক আটক কৰিবলৈ সক্ষম হয় সেনা আৰু আৰক্ষীৰ অভিযানকাৰী দলটোৱে।

আটক হোৱা সদস্যগৰাকীৰ পৰা এটা ০২২ ৰাইফলৰ লগতে তিনিজাঁই সজীৱ গুলী, এটা এ কে চিৰিজৰ ৰাইফল আৰু পাঁচ জাঁই সজীৱ গুলী আৰু ডিটনেতৰ সহ দুটা বিষ্ফোৰক জব্দ কৰা হয়।

দীৰ্ঘদিন ধৰি অসম অৰুণাচল সীমান্তত সংগঠনৰ শক্তি বৃদ্ধি আৰু নতুন সদস্য ভৰ্তিৰ কামত নিয়োজিত হৈ আছিল আটকাধীন  বাংগালো চাকমা।

সেনাই অধিক তথ্যৰ বাবে বৰ্তমান জেৰা অব্যাহত ৰাখিছে উগ্ৰপন্থী সদস্যগৰাকীক।