ৰেচন কাৰ্ড নথকা দৰিদ্ৰ পৰিয়ালসমূহৰ প্ৰতিগৰাকী সদস্যক প্ৰতিমাহে ৫ কেজিকৈ চাউল যোগান ধৰিব ৰাজ্য চৰকাৰে

ভাইৰাছৰ সংক্ৰমণৰ পৰিপ্ৰেক্ষিতত ৰাষ্ট্ৰজুৰি ঘোষণা কৰা ল’কডাউনৰ সময়ছোৱাত ৰাজ্যৰ এজনো দৰিদ্ৰ লোক যাতে অনাহাৰে থাকিবলগীয়া নহয় সেই দিশৰ প্ৰতি লক্ষ্য ৰাখি অসম চৰকাৰে ৰাষ্ট্ৰীয় খাদ্য সুৰক্ষা আইনৰ অধীনৰ ৰেচন কাৰ্ড নথকা অথচ আৰ্থিকভাৱে দুৰ্বল প্ৰতিটো পৰিয়ালৰ প্ৰতিগৰাকী সদস্যৰ বিপৰীতে প্ৰতি মাহে ৫ কেজিকৈ চাউল যোগান ধৰাৰ সিদ্ধান্ত গ্ৰহণ কৰিছে।

আজি কোভিদ-১৯-ৰ সংক্ৰমণ প্ৰতিৰোধৰ বাবে কামৰূপ জিলা প্ৰশাসনে গ্ৰহণ কৰা ব্যৱস্থাৱলীৰ বুজ লৈ মুখ্য মন্ত্ৰী সোণোৱাৱে এইদৰে কয়।

আনহাতে, ল’কডাউনৰ সময়ছোৱাত ৰাজ্যত খাদ্য সামগ্ৰীৰ যাতে অভাৱ নঘটে সেয়া তদাৰক কৰিবলৈ মুখ্য মন্ত্ৰী সোণোৱালে আজি ভাৰতীয় খাদ্য নিগমৰ বিষয়াসকলৰ সৈতেও এক বৈঠকত মিলিত হয়।

মুখ্য মন্ত্ৰী সোণোৱালে নিগমৰ নুনমাটি আৰু চাংসাৰিৰ গুদামসমূহৰ লগতে চাংসাৰিৰ ৰে’লৱে য়াৰ্ড পৰিদৰ্শন কৰি মজুত কৰি ৰখা খাদ্য সামগ্ৰীৰ উপলব্ধতা সম্পৰ্কে বুজ লয়।

ভাৰতীয় খাদ্য নিগমৰ বিষয়াসকলে মুখ্য মন্ত্ৰী সোণোৱালক ভাৰতীয় খাদ্য নিগমৰ অধীনস্থ গুদামসমূহত আঢ়ৈ মাহলৈ ৰাজ্যবাসীক যোগান ধৰিব পৰাকৈ খাদ্য সামগ্ৰী মজুত আছে বুলি কয়।

মুখ্য মন্ত্ৰী সোণোৱালে ৰাজ্যত অত্যাৱশ্যকীয় সামগ্ৰীৰ যাতে কোনো কাৰণতে অভাৱ নঘটে আৰু যোগান ব্যৱস্থাটো সুচল হয় তাৰ বাবে যোগান বিভাগৰ লগতে কৃষি আৰু পশু পালন বিভাগে যৌথ সহযোগিতা আৰু উদ্ভাৱনীমূলক চিন্তা-চৰ্চাৰে কাম কৰিব লাগিব বুলিও মত প্ৰকাশ কৰে।

তদুপৰি, মুখ্য মন্ত্ৰী সোণোৱালে ইতিমধ্যে কাৰ্য্যকৰী হৈ থকা ল’কডাউন কিছু শিথিল কৰি কৃষি কৰ্ম কৰিবলৈ ৰাজ্যৰ কৃষকসকলক অনুমতি দিয়া হৈছে বুলি উল্লেখ কৰি সামাজিক ব্যৱধানৰ নীতি পূৰ্ণৰূপত মানি চলাৰ ওপৰত গুৰুত্ব আৰোপ কৰি ক’ৰ’না ভাইৰাছ নিৰ্মূল কৰিবলৈ কোনো প্ৰতিষেধক বৰ্তমানে আবিষ্কাৰ নোহোৱাৰ পৰিপ্ৰেক্ষিতত নাগৰিকৰ জীৱন সুৰক্ষাৰ বাবে সামাজিক ব্যৱধান মানি চলাই উত্তম পথ বুলি কয়।