বাঙালী সংগঠন নালাগে বিজেপি চৰকাৰেও পাতিব নোৱাৰিব সমাৱেশ, বজ্ৰ ঘোষণা জিতেন দত্তৰ
অসমৰ খিলঞ্জীয়া সংগঠনৰ সৰ্বাত্মক বিৰোধিতা আওকাণ কৰি নাগৰিকত্ব বিধেয়কৰ সপক্ষে শেহতীয়াকৈ বিজেপিৰ ৰাজ্যিক কাৰ্য্যনিৰ্বাহকৰ সিদ্ধান্তৰ পিছতে সমাৱেশ পাতিবলৈ তৎপৰ হৈ উঠা বাঙালী সংগঠনসমূহৰ উদ্যোগত হেঙাৰ হৈ থিয় দিয়াৰ অংগীকাৰ কৰিছে আলফা নেতা জিতেন দত্তই।
নৰ্থ ইষ্ট নাও-ত বৃহস্পতিবাৰে এই বজ্ৰ সংকল্প ঘোষণা কৰিছে আলফা নেতা দত্তই।
“মই অসমত তেওঁলোকক কোনোধৰণৰ সমাৱেশ পাতিবলৈ নিদিওঁ। যিয়ে যি উদ্দেশ্য লৈ আছে মোৰ দৰকাৰ নাই, প্ৰথম কথা মই এই ব্ৰহ্মপুত্ৰ উপত্যকাত হিন্দু বাংলাদেশীৰ সমৰ্থনত কোনো দল-সংগঠনকে ধৰি আনকি চৰকাৰকো গণ সমাৱেশ অনুষ্ঠিত কৰিবলৈ নিদিওঁ,’‘ স্পষ্ট ভাষাৰে এই মন্তব্য আলফা নেতাজনৰ।
অসমৰ ২৭টা বাঙালী সংগঠনৰ উমৈহতীয়া মঞ্চ বুলি দাবী কৰি অহা চি আৰ পি এফ (Citizens’ Rights Protection Forum) নামৰ মঞ্চটোৱে আগবঢ়োৱা আলোচনাৰ প্ৰস্তাৱো পোনপটীয়াকৈ নাকচ কৰিছে দত্তই।
“হিন্দু বাংলাদেশীৰ পক্ষত থকা কোনো সংগঠনৰ সৈতে কোনো আলোচনা নহয়,” আলোচনাৰ বাবে কোনেও “যোগাযোগ” কৰা নাই বুলি স্পষ্ট কৰি এই কথা জনালে আলফা নেতাজনে।
বিধেয়কখনক লৈ অসমৰ দল-সংগঠনৰ ভুল ধাৰণা হৈছে বুলি দাবী কৰি যোৱা ১৫ অক্তোবৰত বাঙালী সংগঠনৰ মঞ্চটোৱে সংবাদমেলযোগে আলোচনাৰ প্ৰস্তাৱ আগবঢ়াইছিল। তাৎপৰ্য্যপূৰ্ণভাৱে সেই সংবাদমেলৰ দুদিন পূৰ্বে মঞ্চটোক “সাৱধান” কৰি দিবলৈ গুৱাহাটীৰ পাণবজাৰত এক বোমা বিস্ফোৰণ কৰিছিল আলফা (স্বাঃ)এ।
বাঙালী সমাৱেশক “মৈত্ৰী সন্মিলন’’লৈ নাম পৰিৱৰ্তন কৰিলেও লাভ নাই বুলি মন্তব্য কৰি দত্তই লগতে কয়, ‘‘তেওঁলোকৰ ইয়াত কোনো অনুষ্ঠান পতাৰ অধিকাৰ নাই। অসমৰ ৰাইজে নিজৰ চিন্তা নিজে কৰিব। কোনোবা হিন্দু বাংলাদেশী সমৰ্থকে আমাৰ জাতিটোৰ কথা চিন্তা কৰাৰ প্ৰয়োজন নাই।‘’
জিতেন দত্তৰ এই সকীয়নিৰ পূৰ্বে অসমৰ প্ৰাক্তন মুখ্য মন্ত্ৰী তৰুণ গগৈয়েও ১৭ নৱেম্বৰত বাঙালী সংগঠনসমূহে আহ্বান কৰা সমাৱেশে “সংঘাত”ৰ সৃষ্টি কৰিব বুলি মন্তব্য কৰি ইয়াৰ বাবে অনুমতি নিদিবলৈ সোণোৱাল চৰকাৰক আহ্বান জনাইছিল।
তাৰোপৰি ৰাজকুমাৰ বৈশ্য নেতৃত্বাধীন জাতীয়তাবাদ পুনৰ নিৰ্মাণ সমিতি আৰু অসম সংগ্ৰামী মঞ্চয়ো এই সমাৱেশত বাধা দিয়াৰ হুংকাৰ দিছিল।