দেশৰ ন্যায় ব্যৱস্থাক ‘ভাৰতীয়কৰণ’ৰ আহ্বান জনালে উচ্চতম ন্যায়ালয়ৰ মুখ্য ন্যায়াধীশ এন ভি ৰামানাই
দেশৰ ন্যায় ব্যৱস্থাক ‘ভাৰতীয়কৰণ’ কৰাৰ আহ্বান জনালে উচ্চতম ন্যায়ালয়ৰ মুখ্য ন্যায়াধীশ এন ভি ৰামানাই।
এই আহ্বান জনাই ৰামানাই কয় যে ভাৰতীয় জনতাৰ স্বাৰ্থতে ঔপনিৱেশিক নীতি গ্ৰহণ কৰি থকাৰ এতিয়া আৰু সময় নহয়।
তেওঁ কয় যে আমাৰ ন্যায় ব্যৱস্থাটো এতিয়াও ঔপনিৱেশিক কালৰ নিয়ম মতেই চলি থকা কথাটো সাধাৰণ ভাৰতীয় লোকৰ বাবে খাপ খোৱা ধৰণৰ হৈ থকা নাই।
সেয়ে আমাৰ ন্যায় ব্যৱস্থাটোক সম্পূৰ্ণ ভাৰতীয়কৰণ কৰি তোলাটো অতি প্ৰয়োজনীয় হৈ পৰিছে বুলি মুখ্য ন্যায়াধীশগৰাকীয়ে তাৎপৰ্যপূৰ্ণ মন্তব্য কৰে।
কৰ্ণাটক ৰাজ্যিক বাৰ কাউন্সিলে আয়োজন কৰা উচ্চতম ন্যায়ালয়ৰ প্ৰয়াত ন্যায়াধীশ মোহন মোহন সান্তনাগৌডাৰ স্মৃতিচাৰণ অনুষ্ঠানত উপস্থিত থাকি উচ্চতম ন্যায়ালয়ৰ মুখ্য ন্যায়াধীশগৰাকীয়ে এনেদৰে কয়।
Latest News:২.৫ কোটি লোকক ভেকচিন প্ৰদান কৰিবলৈ মোদীৰ জন্মদিনটোলৈকে কিয় ৰ’ৱলগীয়া হ’ল? চিদাম্বৰমৰ প্ৰশ্ন
ৰামানাই কয়—’ মই যেতিয়া ভাৰতীয়কৰণৰ কথা কৈছে তেতিয়া এই বিষয়টোৰ ওপৰত সৰ্বাধিক গুৰুত্ব দিছো যাতে আমাৰ ন্যায় ব্যৱস্থাটোৱে দেশৰ সমাজ খনৰ লগতে দেশবাসীৰ বাস্তৱিক প্ৰয়োজনসমূহ পূৰণ কৰিব পাৰে’।
এই সন্দৰ্ভত উদাহৰণ দাঙি ধৰি ৰামানাই কয় যে যেতিয়া গাঁৱৰ পৰা কোনো লোকে আহি পৰিয়ালৰ কোনো বিবাদ সম্পৰ্কীয় শুনানিত উপস্থিত থাকে ,তেতিয়া আদালতৰ কাম-কাজ ইংৰাজী ভাষাতে চলিছে সেয়া গাঁৱৰ পৰা অহা লোকে বুজি নাপাবও পাৰে।
একেদৰে ৰায়সমূহো যথেষ্ট দীঘলীয়া হোৱা বাবে সেয়া বহুতৰে বাবে দুৰ্বোধ্য হৈ পৰে বুলিও ৰামানাই কয়।
ইয়াৰ বাবেই বহুতে অযথা অধিক ধন ভৰিবলগীয়া হোৱাৰ কথাটোও ৰামানাই উল্লেখ কৰে।
সেয়ে আদালতৰ কাম-কাজসমূহ যথা সম্ভৱ সৰল আৰু সহজ কৰি তোলাৰ বিষয়ত মুখ্য ন্যায়াধীশ ৰামানাই মন্তব্য কৰে।